მიუნხენის “ბაიერნის” შემტევი ნახევარმცველი არიენ რობენი მიიჩნევს, რომ მადრიდის “რეალის” დატოვება მის კარიერაში საუკეთესო გადაწყვეტილება იყო. როგორც ჰოლანდიელმა თქვა, მაშინ ამ ნაბიჯის გადადგმა გაუჭირდა, მაგრამ ახლა ამას არ ნანობს.

“როდესაც “რეალის” ფეხბურთელი ვიყავი, ჩვენი მიზანი ჩემპიონთა ლიგის მეათედ მოგება იყო. ეს ჩემი ოცნებაც გახლდათ. მაგრამ იმ 2 სეზონში, რომელიც “რეალში” გავატარე მიზანს ვერ მივაღწიეთ, რადგან გუნდს რთული პერიოდი ჰქონდა.

“რეალიდან” “ბაიერნში” გადასვლა ალბათ უკან გადადგმული ნაბიჯიც იყო, რადგან იმ პერიოდში მიუნხენელები ევროპაში წარმატებით ვერ თამაშობდნენ. თუმცა, უფრო მეტი სათამაშო პრაქტიკა მსურდა. რთული გადაწყვეტილება გახლდათ, მაგრამ ეს ნაბიჯი უნდა გადამედგა. ახლა კი, ვფიქრობ, რომ ეს ჩემს კარიერაში საუკეთესო გადაწყვეტილება იყო”, - უთხრა რობენმა As-ს.

არიენ “რეალიდან” “ბაიერნში” 2009 წლის ზაფხულში გადავიდა. გერმანულ გუნდში ჰოლანდიელმა თავისი შესაძლებლობები მაქსიმალურად წარმოაჩინა და დღემდე გუნდის ერთ-ერთი ლიდერია.