კატალონიის “ბარსელონას” თავდამსხმელ ლიონელ მესის ევროპის საუკეთესო ბომბარდირისთვის განკუთვნილი “ოქროს ბუცი” გადასცეს. 30 წლის არგენტინელმა ლა ლიგის 2016-2017 წლების სეზონში 37 გოლი გაიტანა, ჯამში 74 ქულა დააგროვა და პირველობა არავის დაუთმო.

“ბარსელონას” ფეხბურთელი ამ ნომინაციაში გამარჯვებულად მართალია გასული სეზონის დასრულების შემდეგ გამოცხადდა, თუმცა დაჯილდოების ცერემონიალი ახლა გაიმართა.

მესიმ, ბას დოსტს (34 გოლი - 68 ქულა), პიერ-ემერიკ ობამეიანგს (31 გოლი - 62 ქულა), რობერტ ლევანდოვსკის (30 გოლი - 60 ქულა) და ლუის სუარესს (29 გოლი - 58 ქულა) აჯობა.

“ინდივიდუალური ჯილდოები მხოლოდ ერთი ფეხბურთელის დამსახურება არაა, არამედ მთლიანად გუნდის. თანაგუნდელების გარეშე გოლებს ვერ გავიტანდი და ამ ჯილდოსაც ვერ მოვიგებდი”, - განაცხადა მესიმ, რომელიც კარიერაში მეოთხედ გახდა “ოქროს ბუცის” მფლობელი. აქამდე ეს ჯილდო არგენტინელს 2009-2010 (34 გოლი), 2011-2012 (50 გოლი) და 2012-2013 (46 გოლი) წლების სეზონებშიც გადაეცა.