ზაზა ფაჩულიას “გოლდენ სტეიტი” გასვლაზე “ოკლაჰომასთან” 91:108 დამარცხდა. ფაჩულია სასტარტო 5-ეულში იმყოფებოდა და პარკეტზე 12 წუთი დაჰყო. ამ დროში ზაზამ 2 ქულა და 3 მოხსნა მიითვალა. ქართველმა ცენტრმა 2-დან ორი საჯარიმო სროლა ჩააგდო.

რაც შეეხება უშუალოდ შეხვედრას, “ოკლაჰომამ” თავიდანვე უპირატესობა მოიპოვა და ოკლენდელებმა მთელი მატჩის განმავლობაში ანგარიშის გათანაბრებაც კი ვერ მოახერხეს.

მატჩის საუკეთესო მოთამაშე რასელ უესტბრუკი გახლდათ, რომელმაც 34 ქულა, 10 მოხსნა და 9 პასი მიითვალა. სტეფ კარიმ 24 ქულა ჩააგდო.

“გოლდენ სტეიტი” 13 მოგებით და 5 წაგებით დასავლეთ კონფერენციაში მეორე ადგილს იკავებს.

მომდევნო შეხვედრაში “გოლდენ სტეიტი” შინ “ჩიკაგო ბულზს” დაუპირისპირდება, მატჩი 25 ნოემბერს თბილისის დროით 07:30 საათზე დაიწყება.