ოთხშაბათს, უეფას ჩემპიონთა ლიგაზე მეხუთე ტურის ცენტრალური მატჩი ტურინში გაიმართება: “ბარსელონა” – “იუვენტუსის” სტუმარი იქნება. ამ მატჩამდე უეფას ოფიციალურამ ვებგვერდმა ორივე გუნდის კაპიტანთან საინტერესო ინტერვიუ ჩაწერა.

საგულისხმოა, რომ ჯანლუიჯი ბუფონსა და ანდრეს ინიესტას პასუხების გაცემა ერთი და იგივე კითხვებზე მოუწიათ:

- გთხოვთ, წარმოგვიდგინოთ საკუთარი თავი...

- ბუფონი: ჯანლუიჯი ბუფონი.

- ინიესტა: ანდრეს ინიესტა.

- რამდენი წლის ხართ?

- ბუფონი: 39.

- ინიესტა: 33.

- ვის აქვს უფრო ჭაღარა თმა?

- ინიესტა: ვფიქრობ მე, მაგრამ ჯიჯისაც აქვს ცოტა.

- ბუფონი: რა თქმა უნდა მას. მე ჯერ კიდევ შავი ნატურალური თმა მაქვს.

- როდემდე ითამაშებთ?

- ინიესტა: მანამ, სანამ არ დავიღლები.

- ბუფონი: სავარაუდოდ, მიმდინარე სეზონის ბოლომდე.

- ჯიჯი, დარწმუნებული ხარ?

- უფრო მშვიდი, ვიდრე დარწმუნებული.

- კარიერის დასრულების შიში გაქვთ?

- ინიესტა: არა, არა. ცხოვრებაში ყველაფერს აქვს დასაწყისი და დასასრული. მანამდე უნდა ისიამოვნო, სანამ შესაძლებელია.

- ბუფონი: არა, არ მაქვს. ცხოვრება ძალიან საინტერესოა და ამიტომ კარიერის დასრულების შიში არ მაქვს.

- მომავალში მწვრთნელობას გეგმავთ?

- ინიესტა: დღეის გადმოსახედიდან, ამას საკმაოდ შორს ვხედავ.

- ბუფონი: ეს ჯერ კიდევ არ განმიხილავს.

- საყვარელი მომღერალი?

- ბუფონი: ჩელენტანო.

- ინიესტა: ესტოპა, ისევე როგორც მომწონს კამარონი.

- ანდრეს, ოდესმე გიფიქრიათ მეკარეობაზე?

- არა, მე ვფიქრობ, ეს საკმაოდ რთული იქნებოდა ჩემთვის.

- ჯიჯი, გიფიქრიათ ნახევარმცველობაზე?

- 12 წლამდე ნახევარდაცვაში ვთამაშობდი. შემდეგ 1990 წლის იტალიის მსოფლიოს ჩემპიონატზე კამერუნი თამაშობდა, რომლის ერთ-ერთი სიმბოლო ტომას ნკონო იყო და მსურდა მისთვის მიმებაძა. შემდეგ რჩევა მამაჩემთან გავიარე. მან ნახა, რომ რამდენჯერმე მეკარის პოზიციაზე ვითამაშე და ყოველჯერზე მეუბნებოდა: “შენ არ ხარ ყველაზე ცუდი”.

- რამდენი შვილი გყავთ?

- ბუფონი: სამი.

- ინიესტა: სამი.

- ერთ დღეს, რომ გითხრათ, მამა ფეხბურთელობა მინდა – რას უპასუხებთ?

- ინიესტა: მომეწონება თუ ფეხბურთელობას გადაწყვეტს.

- ბუფონი: ძალიან ბედნიერი ვიქნები, რადგან სპორტით შეიგრძნობ ცხოვრებას. გიყალიბებს დისციპლინას და თავიდან გაშორებს ცხოვრებაში ბევრ ნეგატიურ ხიფათს.

- რას ურჩევდით შვილებს თუ ფეხბურთელობას გადაწყვეტენ?

- ინიესტა: ჰქონდეს თვითრწმენა, იმუშაოს საკუთარ თავზე და დარჩეს თავმდაბალი. ეს თვისებები დადებით პიროვნებას ქმნიან.

- ბუფონი: გაერთოს, იპოვოს ცოტაოდენი ვნებაც და იყოს ფოკუსირებული. და შემდეგ, მალევე გაერკვეს, აქვს თუ არა მომავალი ამ გზაზე.

- ვინ იყვნენ თქვენი გმირები, როდესაც იყავით პატარები?

- ინიესტა: ყოველთვის მომწონდა გვარდიოლა და ლაუდრუპი.

- ბუფონი: ტომას ნ’კონო იყო მეკარე, რომელსაც ყოველთვის ვბაძავდი. მაგრამ ასევე მომწონდა იტალიელი მეკარეები, რომელთაც არავინ ახსენებს – ძენგა, ტაკონი, პერუცი, ტოლდო, პალიუკა, მარკეჯანი...

- ჯიჯი, თქვენი კარიერის საუკეთესო მომენტი?

- ბოლო 5 წელი იყო შთამბეჭდავი, რადგან მე სიამოვნებას ვიღებ ჩემი დროით. და შემდეგ მსოფლიოს ჩემპიონატის მოგება. ასევე ტიტულები, რომელიც “იუვეში” იქამდე მოვიპოვე. განვიცდიდი “პარმას” დატოვებას, მაგრამ მეორე მხარეს მელოდებოდა მსოფლიოს ერთ-ერთი უდიდესი გუნდი.

- ანდრეს, თქვენი კარიერის საუკეთესო მომენტი?

- მქონდა ბედნიერება მეცხოვრა, როგორც სპორტსმენს. საუკეთესო მომენტები მაკავშირებს, გუნდთან და ეროვნულ ნაკრებთან. პერსონალურად კი ჩემი ბედნიერება, ჩემი ოჯახი, შვილებია.

- ჯიჯი, როგორ წარმოგიდგენიათ თქვენი ბოლო თამაში?

- წარმომიდგენია, როგორც პირველი – დიდი ენთუზიაზმით და დიდი სიამაყით.

- ანდრეს, როგორ წარმოგიდგენიათ ბოლო თამაში?

- როგორც განსაკუთრებული დღე, ემოციური. ვიქნები ამაყი იმ გზით, რაც გავიარე.

- ვინ მოიგებს წელს ჩემპიონთა ლიგას?

- ინიესტა: იმედია, რომ “ბარსა” მოიგებს.

- ბუფონი: მიმდინარე წელს ჩემპიონთა ლიგას ის გუნდი მოიგებს, რომელიც მარტს ფიზიკურად და მენტალურად საუკეთესო კონდიციებში შეხვდება. მინდა, რომ ეს გუნდი “იუვე” იყოს.