იტალიის ეროვნული ნაკრები ჯანლუიჯი ბუფონისა და დანიელე დე როსის შემდეგ კიდევ ერთმა მსოფლიოს ჩემპიონმა, ანდრეა ბარძალიმ დატოვა. ამის შესახებ ოფიციალური განცხადება თავად ვეტერანმა მცველმა გააკეთა.

“ეს, ჩემს საფეხბურთო კარიერაში ყველაზე დიდი იმედგაცრუებაა. ეროვნული ნაკრები ერთადერთი განცდაა და მართლაც გულდასაწყვეტია, რომ ყველაფერი ასე დასრულდა.

დღეს იყო ჩემი ბოლო სანაკრებო თამაში. დანიელე დე როსისთან და ჯანლუიჯი ბუფონთან ერთად 2006 წელს მსოფლიოს ჩემპიონი გავხდი და გვქონდა უდიდესი ემოციები, მაგრამ ახლა დიდ მწუხარებას განვიცდით. 4-5 ვეტერანის ციკლი დასრულებულია და ახლა ახალგაზრდების ჯერია. მათ წარმატებებს მთელი გულით ვუსურვებ”, - აღნიშნა ბარძალიმ.

ანდრეა ბარძალიმ იტალიის ეროვნულ ნაკრებში პირველად 2004 წლის ნოემბერში ითამაშა. იქედან მოყოლებული 36 წლის მცველმა ეროვნული გუნდის ღირსება 73 შეხვედრაში დაიცვა (გოლი არ გაუტანია). ანდრეა ბარძალი 2006 წელს მსოფლიოს ჩემპიონი გახდა და მაშინდელ მუნდიალზე ორ შეხვედრაში მიიღო მონაწილეობა.