ესპანეთის საკალათბურთო ჩემპიონატის ლიგა ენდესას VIII ტურში მორიგი გამარჯვება მოიპოვა “სასკი ბასკონიამ”. ბასკებმა საკუთარ მოედანზე “ჟუვენტუტ ბადალონას” უმასპინძლეს და 87:77 დაამარცხეს.

აღნიშნულ გამარჯვებაში დიდი როლი ითამაშა თორნიკე შენგელიამ. “ბასკონიას” ქართველმა კაპიტანმა, რომელიც სასტარტო ხუთეულში არ ყოფილა, 21:35 წუთი ითამაშა და ამ დროში 19 ქულა, 2 მოხსნა, 2 ჩაჭრა და 1 დაფარება დააგროვა.

თორნიკემ 11-დან ექვსი ორქულიანი, 2-დან ერთი სამქულიანი და 4-დან ოთხი სამქულიანი ჩააგდო. ჩვენებური თანაგუნდელთა შორის ყველაზე შედეგიანი იყო. მაგალითად შენგელიას შემდეგ “ბასკონიას” ყველაზე მეტი ქულა მატ იანინგმა შესძინა (11). მთლიანად მატჩში კი ქულების მხრივ შენგელია მხოლოდ “ჟუვენტუტის” წევრ ტომაშ გიელოს ჩამორჩა (21 ქულა). საბოლოოდ, თორნიკე შენგელია შეხვედრის MVP გახდა.

“ბასკონიას” რვა ტურის თავზე 4 გამარჯვების წილ 4 მარცხი აქვს და მერვე პოზიციაზე იმყოფება. ბასკები მომდევნო ტურში 19 ნოემბერს, სტუმრად “ბურგოსს” დაუპირისპირდებიან.