აშშ-ის ნაკრების ყველა დროის ერთ-ერთი საუკეთესო ბომბარდირი ლენდონ დონოვანი ქვეყნის ფეხბურთის ფედერაციის საპრეზიდენტო არჩევნებში მონაწილეობას კატეგორიულად გამორიცხავს.
ESPN-ისთვის მიცემულ ინტერვიუში დონოვანმა განაცხადა, რომ არ სურს რაიმე საერთო ჰქონდეს ამ საქმიანობასთან, ამიტომ მომავალ არჩევნებში საკუთარი კანდიდატურის წამოყენებაზე უარი თქვა.
დონოვანმა, რომელსაც აშშ-ის ნაკრების მაისურით ჩატარებულ 157 მატჩში 57 გოლი გაუტანია, ფეხბურთელის კარიერა გასულ წელს დაასრულა და ამჟამად ტელევიზიაში საფეხბურთო მიმომხილველად მუშაობს.
მას შემდეგ, რაც აშშ-ის ნაკრებმა მსოფლიოს 2018 წლის ჩემპიონატის საგზურის მოპოვება ვერ შეძლო, ფეხბურთის ფედერაციის ამჟამინდელი პრეზიდენტი სუნილ გულატი კრიტიკის ქარცეცხლში მოექცა და მოახლოებულ არჩევნებში მისი მონაწილეობა აღარ განიხილება.
