საქართველოს ძიუდოისტთა ნაკრების წევრმა ვაჟა მარგველაშვილმა (66 კგ) აბუ დაბიში დღეს დაწყებულ გრან სლემზე ბრინჯაოს მედალი მოიპოვა და 500 სარეიტინგო ქულა გამოიმუშავა.

პრესტიჟულ საერთაშორისო ტურნირზე მეორე ნომრად განთესილმა ევროპის შარშანდელმა ჩემპიონმა ძირითად ბადეში სამი შეხვედრა ჩაატარა. სერბი სტრაინია ბუნჩიჩი და ყაზახი გუმარ კირგიზბაიევი სამ-სამ წუთში ჩამოიშორა. მეოთხედფინალში კი აზერბაიჯანელ ნიჯათ შიხალიზადესთან იპონითვე წააგო და რეპეშაჟის ნახევარფინალში გადაერთო, სადაც ირანელ გასემ ნურიზადეს ვაზარით სძლია. გადამწყვეტ ბრძოლაში კი მარგველაშვილი ყაზახ იელდოს ჟუმაკანოვს დაეჭიდა და უილეთო შეხვედრაში, 2 წუთსა და 21 წამში 3 შიდო მიაღებინა.

სწორედ ჟუმაკანოვთან დაჭიდებით დაიწყო და დაასრულა გრან სლემზე გამოსვლა 66 კილოგრამ წონით კატეგორიაში მოჭიდავე მეორე ქართველმა - ლაშა გიუნაშვილმა.

დღესვე, არაბულ ტატამზე ევროპის 2013 წლის ჩემპიონი ამირან პაპინაშვილიც (60 კგ) გავიდა, მაგრამ კვარცხლბეკამდე ერთი ნაბიჯი დააკლდა.

ტურნირზე პირველ ნომრად განთესილი ქართველი მსუბუქწონოსანი უმაღლესი ტიტულისთვის ბრძოლას ნახევარფინალიდან გამოეთიშა, ოლიმპიური თამაშების ბრინჯაოს პრიზიორთან - ბრაზილიელ ფელიპე კიტადაისთან მარცხით. იქამდე პაპინაშვილმა ორი მეტოქე ჩამოიშორა. ძიუდოს საერთაშორისო ფედერაციის სახელით მოჭიდავე დანიელ ბენ დავიდს 2 წუთსა და 46 წამში აჯობა, ხოლო ფრანგ ვინსენ ლიმარს - "ოქროს დროში" აღებული ვაზარით. რეპეშაჟის ფინალში კი ესპანელ ფრანსისკო გარიგოსს დაუპირისპიდა და დამატებით დროში შებოჭვაზე მოჰყვა.

მე-5 ადგილის დაკავებით ამირან პაპინაშვილმა 360 სარეიტინგო ქულა გამოიმუშავა.

აბუ დაბის გრან სლემი 28 ოქტომბრის ჩათვლით გაგრძელდება. საქართველოს სახელით კი კონკურენციაში კიდევ სამი ძიუდოისტი ჩაებმება. ხვალ ტატამზე ზებედა რეხვიაშვილი (81 კგ) გავა, ზეგ - ბექა ღვინიაშვილი (90 კგ) და ვარლამ ლიპარტელიანი (100 კგ).