ძიუდოში მსოფლიოს 2017 წლის ახალგაზრდული ჩემპიონატი იაპონიის ჰიმნით დაგვირგვინდა. ოთხდღიანი ინდივიდუალური შეჯიბრების შემდეგ, დღეს, ზაგრებულ ტატამზე გუნდურ პირველობაზე გათამაშდა მედლები და უმაღლეს ტიტულს სწორედ იაპონიის ახალგაზრდული ნაკრები დაეუფლა.

მსოფლიოს გუნდური ჩემპიონატის 16 მონაწილეს შორის საქართველოს ვაჟთა და გოგონათა შერეული ნაკრებიც იყო, მაგრამ ტურნირს საწყისი ეტაპიდანვე გამოეთიშა, ჰოლანდიასთან მარცხით.

ქართველმა ძიუდოისტებმა რვა შეხვედრიდან ხუთი წააგეს. აქედან ერთი უბრძოლველად, რადგან გოგონებს შორის, 48 კილოგრამ წონით კატეგორიაში ქართულ განაცხადში არავინ იყო. თემურ ნოზაძემ (60 კგ), ტატო გრიგალაშვილმა (73 კგ) და ლუკა მაისურაძემ (90 კგ) თავიანთ პირად შეხვედრებში იმარჯვეს. ეთერ ლიპარტელიანმა (57 კგ), მარიამ ჭანტურიამ (63 კგ), სოფიო სომხიშვილმა (+78 კგ) და გელა ზაალიშვილმა (+90 კგ) კი წარუმატებლად იჭიდავეს და საქართველოს ახალგაზრდული ნაკრები მერვედფინალში ჩარჩა.

ჰოლანდელებმა შემდეგ ეტაპებზე უზბეკეთისა (5:3) და გერმანიის (5:3) ნაკრებები ჩამოიშორეს და საჩემპიონო ბრძოლაში იაპონიასთან უშანსოდ წააგეს - 1:5. მესამე საპრიზო ადგილები გერმანიისა და რუსეთის ნაკრებებმა დაიკავეს.