ბრაზილიის 17-წლამდელთა ნაკრების და "პალმეირასის" შემტევი ნახევარმცველი ალან სოუზა მომდევნო წელს მადრიდის "რეალის" ფეხბურთელი გახდება. როგორც AS-ი იუწყება, სამხრეთამერიკელი და ესპანური კლუბის წარმომადგენელი სიტყვიერად უკვე შეთანხმდნენ, ახლა კი კლუბებს შორის მოლაპარაკება დაიწყება.

ფეხბურთელის გამოსასყიდი თანხა 50 მილიონი ევროა და კლუბთან კონტრაქტი 2019 წლის ივლისამდე აკავშირებს. "რეალი" კი გეგმავს ტრანსფერი შემდეგ წელს განახორციელოს და მოთამაშის სანაცვლოდ 50 მილიონზე გაცილებით დაბალი თანხა გადაიხადოს. ალანი "რეალის" სარეზერვო გუნდში ჩაირიცხება.

"სამეფო კლუბმა" უკვე განახორციელა 17 წლის ვინისიუსის ტრანსფერი, რომელიც ჯერჯერობით "ფლამენგოს" ღირსებას" იცავს და ესპანეთში შემდეგი წლის ზაფხულში გადაბარგდება. ასევე "რეალის" ხელმძღვანელობა გეგმავს 2018 წელს გუნდში დააბრუნოს "ჰერენვეენსა" და "დეპორტივოში" განათხოვრებული მარტინ ედეგორი და ფედერიკო ვალვერდე.