ცნობილი ფრანგი სპეციალისტი ჟერარ ულიე იმ პერიოდს იხსენებს, როდესაც „ლივერპულს“ ედგა სათავეში. მისი განცხადებით, ინგლისურმა გუნდმა თავის დროზე კრიშტიანუ რონალდუს ჰარი კიუელის ყიდვა ამჯობინა.

ფრანგი დანანებით აღნიშნავს, რომ პორტუგალიელთან ერთად „ლივერპული“ ნანატს ჩემპიონობას იზეიმებდა პრემიერლიგაში, მაგრამ ხელფასის გამო ტრანსფერზე უარი თქვა:

„კრიშტიანუ რონალდუს თამაში 21-წლამდელთა ტურნირზე ვნახე და პირდაპირ მასთან მივედი სასაუბროდ. იგი ჯერ კიდევ „სპორტინგში“ თამაშობდა, მაგრამ მისი ხელფასი საკმაოდ მაღალი იყო. „ლივერპულს“ კი არ შეეძლო პორტუგალიელი ახალგაზრდასთვის დამაკმაყოფილებელი გასამრჯელო გადაეხადა.

ამიტომაც, ჩვენ არჩევანი ჰარი კიუელზე შევაჩერეთ, რომელიც იმ დროს ძალიან კარგ ფორმაში იყო, მაგრამ „ლივერპულში“ ტრავმების გამო თავი ვერ დაიმკვიდრა. რონალდუზე უარის თქმას ვნანობ - მასთან ერთად ჩვენ ინგლისის ჩემპიონები გავხდებოდით“, - იხსენებს ულიე.

„ლივერპულმა“ ჰარი კიუელი 2003 წლის ზაფხულში „ლიდს იუნაიტედიდან“ შეიძინა. იმავე ზაფხულს რონალდუ პრემიერლიგაში მაინც აღმოჩნდა, თუმცა „მანჩესტერ იუნაიტედის“ რიგებში.