საქართველოს 16-წლამდე კალათბურთელთა ნაკრებმა ევროპის ჩემპიონატის B დივიზიონის გათამაშება 2 დასანანი მარცხით დაიწყო, თუმცა, შემდეგ 2 გამარჯვება იზეიმა და შემდეგ ეტაპზე გასვლის არცთუ ცუდ შანსს ინარჩუნებს.

შეგახსენებთ, რომ ბოსნია-ჰერცეგოვინის დედაქალაქ სარაევოში მიმდინარე ტურნირის სტარტზე გია კაზანჯიანის შეგირდებმა ჩეხეთთან (51:52) და უნგრეთთან (59:63) წააგეს, მაგრამ მობილიზება მოახერხეს და ჯერ აუტსაიდერ ლუქსემბურგს (83:39) მოუგეს, გუშინ კი ბელარუსიც დაამარცხეს – 74:66.

ქართველთათვის სასიკეთოდ დასრულდა ის შეხვედრებიც, რომელიც ჩვენს განსაკუთრებულ ინტერესს იწვევდა. თავდაპირველად, ავსტრიამ უნგრეთს ოვერტაიმში 76:71 სძლია, შემდეგ კი უნგრეთი უკვე ჩეხეთთან დამარცხდა – 56:70.

შედეგად, ის გამოვიდა, რომ თუკი დღეს ბოლო ტურში საქართველოს ნაკრები ავსტრიას 5 ქულის სხვაობით დაამარცხებს, D ჯგუფში ჩეხეთის 16-წლამდელთა გუნდის კვალად მე-2 ადგილს დაიკავებს და ელიტარული A დივიზიონისთვის ბრძოლას გააგრძელებს.

შესაძლოა, კაზანჯიანის შეგირდებს ავსტრიელთა მინიმალური ანგარიშით ძლევაც ეყოთ, თუკი მოგვიანებით უნგრელები ბელარუსთან წააგებენ, თუმცა, ცხადია, ქართველები აღნიშნულის იმედად ვერ იქნებიან.

და ერთიც. B დივიზიონში გამართული 4 ტურის თავზე მოხსნებში საუკეთესო მაჩვენებელი (საშუალოდ 13.0) ქართველ ვილი ისიანს აქვს. შეგახსენებთ, რომ ეს ისიანია, რომელმაც საქართველოს 16-წლამდელთა ჩემპიონატში “მართვეს” 127 ქულა (!) ჩაუგდო.

სატურნირო მდგომარეობა

1. ჩეხეთი                  4    0    295:215    8

2. ავსტრია                3    1    247:235    7

3. საქართველო      2    2    267:220    6

4. უნგრეთი              2    2    281:259    6

5. ლუქსემბურგი      1    3    187:291    5

6. ბელარუსი            0    4    237:294    4

12 აგვისტო

19:30 ავსტრია – საქართველო

22:00 ჩეხეთი – ლუქსემბურგი

22:00 უნგრეთი – ბელარუსი