A ჯგუფის ბოლო ტურის ცენტრალური შეხვედრა სლოვენიის და საფრანგეთის ნაკრებებს შორის გაიმართა, რომელშიც იგორ კოკოშკოვის გაწვრთნილმა გუნდმა გაიმარჯვა და ჯგუფური ეტაპი უდანაკარგოდ დაასრულა.

ბევრისთვის გასაკვირად, სლოვენიამ საკმაოდ იოლად იმარჯვა. ისინი საწყის სამ პერიოდში დიდ უპირატესობას ფლობდნენ და დასკვნითი პერიოდის წინ 77:51 იგებდნენ. ფრანგებმა რაც მოახერხეს სხვაობის 17 ქულამდე შემცირებაა. საბოლოოდ სლოვენიის ნაკრებმა 95:78 მოიგო და პირველი ადგილი სრულიად დამსახურებულად დაიკავა.

სლოვენიელთაგან საუკეთესო გორან დრაგიჩი გახლდათ, რომლის ანგარიშზეც 22 ქულა, 3 მოხსნა და 8 გადაცემაა. საფრანგეთის ნაკრებიდან საუკეთესო ნანდო დე კოლო იყო, რომელმაც 16 ქულას, 2 მოხსნას და 2 გადაცემას მოუყარა თავი.

ფინეთის ნაკრებმა დაძაბულ ბრძოლაში აუტსაიდერი ისლანდია დაამარცხა და ფლეი-ოფში მეორე ადგილით გავიდა. ისლანდიამ, რომელმაც წინა ყველა შეხვედრა უშანსოდ წააგო, ფინეთს დიდი წინააღმდეგობა გაუწია და უკანასკნელი პერიოდის წინ 7 ქულით იგებდა კიდეც, მაგრამ მასპინძლებმა საკუთარი გულშემატკივრების წინაშე იძალეს და თამაში შემოაბრუნეს – 83:79.

ფინეთიდან ყველაზე შედეგიანი მოთამაშე კვლავ ლაური მარკანენი იყო, რომელმაც 23 ქულა ჩააგდო და ორი მოხსნა მიითვალა. ისლანდიიდან საუკეთესო ჯონ არნორ სტეფანსონი გახლდათ, მის ანგარიშზე 13 ქულა, 2 მოხსნა და 2 გადაცემაა.

ჯგუფის მესამე მატჩში საბერძნეთი ნაკრებმა პოლონეთი დაამარცხა და მეოთხე ადგილს დაეუფლა. უკანასკნელი პერიოდის წინ ბერძნები მხოლოდ 3 ქულით იგებდნენ, მაგრამ დროის დასკვნით მონაკვეთში მეტოქე დაჩაგრეს და 95:77 მოიგეს.

ბერძენთაგან ყველაზე შედეგიანი კოსტას სლოუკასი იყო, რომელმაც საკუთარ გუნდს 26 ქულა, 4 მოხსნა და 3 გადაცემა შესძინა, ხოლო პოლონეთიდან დამიან კულიგი ბრწყინავდა – 26 ქულა და 7 მოხსნა.

ამრიგად, სლოვენიის, ფინეთის, საფრანგეთის და საბერძნეთის ნაკრებები ფლეი-ოფში ითამაშებენ, ხოლო პოლონეთისთვის და ისლანდიისთვის გათამაშება დასრულებულია.

სლოვენია – საფრანგეთი 95:78 (28:22; 24:13; 25:16; 18:27)

ფინეთი – ისლანდია 83:79 (24:18; 18:22; 10:19; 31:20)

საბერძნეთი – პოლონეთი 95:77 (23:29; 26:14; 21:24; 25:10)

საბოლოო მდგომარეობა