დღეს, კალათბურთში ევროპის 2017 წლის ჩემპიონატი დაიწყება. ეს, ის ტურნირია, რომელსაც ჩვენი დიდი იმედი უკავშირდება. საქართველოს ნაკრები ევრობასკეტზე მიჯრით მეოთხედ იასპარეზებს და ვიმედოვნებთ, რომ ისტორიაში საუკეთესო შედეგს აჩვენებს.
გამართლდება თუ არა, ჩვენი ვარაუდი და იმედი, ამას ახლო მომავალი გვამცნობს. იქამდე კი, სასიამოვანოა, რომ ჩვენი ქვეყნის მთავარი გუნდის შანსს უცხოური გამოცემებიც სათანადოდ აფასებენ. მაგალითად, ინტერნეტპორტალი Eurohoops.net-ი მიიჩნევს, რომ ილის ზუროსის ნაკრები უფრო ძლიერია, ვიდრე თუნდაც რუსეთის ან თურქეთის ნაკრებები.
აღნიშნულმა წყარომ ევრობასკეტის 24 ნაკრებს სტატია მიუძღვნა და მათ ევროპის ჩემპიონატის დაწყებამდე ადგილები მიანიჭა. საქართველოს ნაკრები 24 გუნდს შორის მეცხრე პოზიციაზე განათავსა.
მოსამზადებელი ეტაპი: 8/10
პოტენციალი: 6/10
“შესაძლოა ეს იყოს საქართველოს ტურნირი ზაზა ფაჩულიას ხელმძღვანელობით. ამ გუნდს ყველაფერი აქვს, რომ თავის ისტორიაში საუკეთესო შედეგი აჩვენოს ევრობასკეტზე. იმის შემდეგ, რაც მათ მოსამზადებელ ეტაპზე სერბეთს, ლიტვას, ლატვიასა და საბერძნეთს მოუგეს, ახლა მხოლოდ ის დარჩენიათ, რომ იგივე ოფიციალურ ტურნირზეც გაიმეორონ”, - წერს გამოცემა საქართველოს ნაკრების შესახებ.
შეგახსენებთ, საქართველო ევრობასკეტზე B ჯგუფში ითამაშებს ისრაელის, ლიტვის, გერმანიის, უკრაინისა და იტალის ნაკრებების წინააღმდეგ. ილიას ზუროსის გუნდი პირველ მატჩს დღეს ჩაატარებს – ლიტვასთან შეხვედრა თბილისის დროით 19:30 საათზე დაიწყება.
აღსანიშნავია, რომ ზემოხსენებულ სტატიაში საქართველოზე წინ ქვეჯგუფის მეტოქეებიდან მხოლოდ ლიტვის ნაკრებია, რომელსაც მეხუთე ადგილი აქვს მინიჭებული. გარდა ამისა, ჩვენს წინ მდგომი რვა ნაკრებიდან ოთხს, ზუროსის გუნდმა წელს სპარინგ მატჩებში უკვე აჯობა: ლიტვას, საბერძნეთს, სერბეთსა და ლატვიას.
აქვე, გთავაზობთ ევრობასკეტის მონაწილე გუნდების პოზიციებს Eurohoops.net-ის ვერსიით:
1. ესპანეთი
2. სერბეთი
3. ხორვატია
4. საფრანგეთი
5. ლიტვა
6. სლოვენია
7. ლატვია
8. საბერძნეთი
9. საქართველო
10. იტალია
11. თურქეთი
12. რუსეთი
13. ისრაელი
14. პოლონეთი
15. გერმანია
16. მონტენეგრო
17. ფინეთი
18. ბელგია
19. უნგრეთი
20. ჩეხეთი
21. დიდი ბრიტანეთი
22. ისლანდია
23. უკრაინა
24. რუმინეთი
