დორტმუნდის “ბორუსიამ” “ჰოფენჰაიმის” მცველი ჟერემი ტოლიანი გაიფორმა. როგორც “ყვითლების” ვებგვერდი ოფიციალურად იტყობინება, 23 წლის ფეხბურთელის ტრანსფერი 5 მილიონი ევროს სანაცვლოდ შედგა, ხოლო კონტრაქტი ხუთი წლის ვადით გაფორმდა.

ტოლიანი “ჰოფენჰაიმის” სასტარტო შემადგენლობაში იშვიათად ხვდებოდა და ხელშეკრულებაც გაისად ეწურებოდა. სწორედ ამიტომ, “სოფლელები” 5 მილიონ ევროდ გაყიდვაზე დათანხმდნენ.

ჟერემიმ ზაფხულში ევროპის ახალგაზრდულ ჩემპიონატზე კარგი შთაბეჭდილება დატოვა და ჩემპიონატის სიმბოლურ ნაკრებშიც მოხვდა – თავი რამდენიმე საგოლე პასითაც გამოიჩინა. აღსანიშნავია, რომ “ბორუსიას” გარდა ფეხბურთელს “ტოტენჰემი”, “ჩელსი”, “ბაიერნი”, “ნაპოლი” და “იუვენტუსიც” ეპატიჟებოდნენ.

ჟერემი ტოლიანმა გასულ სეზონში “ჰოფენჰაიმის” რიგებში 20 შეხვედრა ჩაატარა და ერთი გოლი გაიტანა. მიმდინარე სეზონში კი, ბუნდესლიგის ორივე მატჩი სრულად ჩაატარა.