ბუდაპეშტში მიმდინარე მსოფლიოს ჩემპიონატზე ძიუდოში, ინდივიდუალურ პირველობაზე მედლების თოთხმეტი კომპლექტიდან ოთხი გათამაშდა და ოთხივე ოქრო ერთი ქვეყნის ნაკრების ხელშია - გუშინდელის დარად, დღესაც, კვარცხლბეკის უმაღლეს საფეხურზე იაპონელები ავიდნენ.

მამაკაცთა შორის, 60 კილოგრამ წონით კატეგორიაში ყველას ჰიფუმი აბემ აჯობა. 20 წლის ძიუდოისტის ყველაზე დიდი მიღწევა აქამდე ჭაბუკთა და ახალგაზრდულ მსოფლიოს ჩემპიონატებზე მოპოვებული ვერცხლის მედლები იყო (4 წლის წინ, ჭაბუკებში გადამწყვეტ ბრძოლაში კობა მჭედლიშვილთან დამარცხდა). უფროსებში კი მსოფლიოს კონკურენციაში პირველად ჩაერთო და ფინალურ ბრძოლებში წაგებების ტრადიციაც პირველსავე ცდაზე შეწყვიტა.

სწორედ ჰიფუმი აბესთან მარცხით დაასრულა ძირითად ბადეში გამოსვლა საქართველოს ნაკრების წევრმა, ევროპის 2013 წლის ჩემპიონმა ვაჟა მარგველაშვილმა. ქართულ-იაპონური დაპირისპირება მეოთხე წუთზე, ჩვენებურის ვაზარიზე დაცემით და შებოჭვით დასრულდა. თუმცა იქამდე იყო ერთი ეპიზოდი, როდესაც მარგველაშვილის მიერ შესრულებული გდება ტატამის მსაჯმა ვაზარით შეაფასა. მსაჯთა მაგიდამ კი ვიდეოგანხილვის შემდეგ სხვაგვარი გადაწყვეტილება მიიღო – ქულა გააუქმა.

აბესთან დაჭიდებამდე ვაჟა მარგველაშვილმა ოთხი ეტაპი დაძლია.

იორდანიელი ბილალ ეიელსალმანი 2 წუთსა და 17 წამში გაფრთხილებებით ჩამოიშორა. სამხრეთაფრიკელი სიაბულელა მაბულუ 56 წამში შებოჭა. ამერიკელ რაიან ვარგასს წუთი და 25 წამი აკმარა. ნახევარფინალში კი მსოფლიოს მოქმედი ჩემპიონის რანგში მოჭიდავე სამხრეთკორეელ ბაულ ანს დაუპირისპირდა. მას იქამდე ორჯერ შეხვედროდა და ორჯერვე წაეგო. უნგრულ ტატამზე კი რევანში დაძაბულ, რვაწუთიან, უილეთო ბრძოლაში აიღო, მომგებიანი შიდოს უპირატესობით.

წარუმატებელი ნახევარფინალიდან მარგველაშვილი რეპეშაჟის ფინალში გადაერთო და სამხრეთ კორეის ნაკრების კიდევ ერთი წევრი ლიმვან კიმი დაამწუხრა. თავიდან ქართველი ძიუდოისტი ვაზარით ჩამორჩა, მაგრამ მეოთხე წუთის დასაწყისში თავადაც შეასრულა ვაზარი, ზედ შებოჭვაც მიაყოლა და საქართველოს ნაკრებს მიმდინარე ჩემპიონატზე პირველი მედალი მოუტანა.

ფინალში ჰიფუმი აბე რუს მიხაილ პულიაევს დაეჭიდა და სუფთად მოუგო. მსოფლიოს პოდიუმის მესამე საფეხურზე კი ვაჟა მარგველაშვილთან ერთად ებრაელი ტალ ფლიკერი ავიდა, რომელმაც გადამწყვეტ შეხვედრაში უკრაინის ნაკრების წევრი გიორგი ზანთარაია დაამარცხა.

ქალთა შორის, 52 კილოგრამ წონით კატეგორიაში, მსოფლიოს პირველობა იაპონური ფინალით დაგვირგვინდა – აი შიშიმემ ნაცუმი ცუნოდას სძლია და აზიის ჩემპიონატის ორ ოქროს, მსოფლიოს უმაღლესი ტიტული მიამატა.

ხვალ საქმეში 73 კილოგრამ წონით კატეგორიაში მოჭიდავე მამაკაცები და 57 კილოგრამში მოჭიდავე ქალები ჩაებმებიან. საქართველოს ნაკრებს კი წარმოადგენენ ლაშა შავდათუაშვილი და მარიამ ჯანაშვილი.

ძიუდო

მსოფლიოს ჩემპიონატი

ბუდაპეშტი

29 აგვისტო

მამაკაცები

66 კგ

1 ჰიფუმი აბე (იაპონია)

2 მიხაილ პულიაევი (რუსეთი)

3 ვაჟა მარგველაშვილი (საქართველო)

3 ტალ ფლიკერი (ისრაელი)

ქალები

52 კგ

1 აი შიშიმე (იაპონია)

2 ნაცუმი ცუნოდა (იაპონია)

3 ნატალია კუზიუტინა (რუსეთი)

3 ერიკა მირანდა (რუსეთი)