2007 წლის 28 აგვისტო “სევილიას” ნახევარმცველისთვის, ანტონიო პუერტასთვის საბედისწერო აღმოჩნდა.

22 წლის ფეხბურთელს ლა ლიგის 2007/2008 წლების სეზონის პირველი ტურის მატჩში, რომელშიც მისი გუნდი შინ “ხეტაფეს” ეთამაშებოდა, გული შეტევა დაემართა. ახალგაზრდა მოთამაშეს პირველადი დახმარება ივიცა დრაგუტინოვიჩმა (ენა დაუჭირა) და ანდრეს პალოპმა აღმოუჩინეს, წამებში კი საქმეში ექიმები ჩაერთნენ და ანტონიოს მოსულიერება მოახერხეს.

პუერტამ მოედნიდან საკუთარი ფეხით გავიდა, თუმცა გასახდელში მიმავალ გზაზე გულის შეტევა გაუმეორდა და გონება კიდევ ერთხელ დაკარგა. ანტონიო უმალ საავადმყოფოში გადაიყვანეს, თუმცა ექიმების დიდი მცდელობის მიუხედავად, ის კომიდან ვერ გამოვიდა და რამდენიმე დღეში გარდაიცვალა.

ანტონიო “სევილიას” საფეხბურთო სკოლის აღზრდილი იყო. ის ძირითად გუნდში 2004 წელს გამოჩნდა და ლა ლიგაში გამართულ 55 მატჩში 5 გოლის გატანა მოახერხა. მან “დალაქების” რიგებში უეფას თასის (ორჯერ), ესპანეთის თასის, ევროპის და ესპანეთის სუპერთასების მოგება მოასწრო. პუერტამ ერთი შეხვედრა ესპანეთის ნაკრების მაისურითაც გამართა.