"ინდეპენდიენტეს" აწ უკვე ყოფილი ნახევარმცველი ემილიანო რიგონი კარიერას "ზენიტში" გააგრძელებს. როგორც რუსული კლუბის ოფიციალური ვებგვერდი იუწყება, 24 წლის სამხრეთამერიკელი მოთამაშე გუნდში მომდევნო ოთხი სეზონის განმავლობაში დარჩება. ტრანსფერის სანაცვლოდ არგენტინელებმა 9 მილიონი ევრო მიიღეს.

რიგონი "ბელგრანოს" აკადემიის აღზრდილია და "ინდეპენდიენტეში" 2016 წლის დასაწყისში გადავიდა. მას შემდეგ ფეხბურთელმა 47 მატჩი ჩაატარა, გაიტანა 13 გოლი და 7 საგოლე გადაცემა შეასრულა.