დიეგო კოშტასა და ლონდონის “ჩელსის” ხელმძღვანელობას შორის ურთიერთობა დღითი დღე მწვავდება. ბრაზილიური წარმომავლობის ესპანელი ფორვარდი კვლავ უარს ამბობს “არისტოკრატთა” რიგებში ვარჯიშზე და ახალი კლუბის ძიებას განაგრძობს, “ჩელსის” თავკაცები კი ფეხბურთელის ურჩობის ატანას აღარ აპირებენ და მას მკაცრი ფინანსური სასჯელით ემუქრებიან.

თუკი კოშტა გუნდს უახლოეს დღეებში არ დაუბრუნდება, ის კონტრაქტის პირობების დარღვევისთვის 3,2 მილიონი ევროთი დაჯარიმდება. ფეხბურთელს ახალი სეზონისთვის მოსამზადებელი ეტაპის ჩაგდების გამო ფინანსური სანქცია ადრეც დააკისრეს - ორი კვირის ხელფასი ჩამოაჭრეს, რაც დაახლოებით 300 ათას ევროს შეადგენს.

როგორც ცნობილია, კოშტას მის ყოფილ კლუბში, მადრიდის “ატლეტიკოში” დაბრუნება სურს, თუმცა ამ ტრანსფერის განხორციელებას ხელს ფიფას მიერ მადრიდელთათვის დაწესებული სასჯელი უშლის - “ატლეტიკოს” ზამთრამდე ახალი ფეხბურთელების დარეგისტრირება აკრძალული აქვს.

გასულ სეზონში დიეგო კოშტამ “ჩელსის” მაისურით ყველა ტურნირზე ჩატარებულ 42 მატჩში 22 გოლი გაიტანა. პრობლემები კი, ფეხბურთელსა და ლონდონელთა მთავარ მწვრთნელ ანტონიო კონტეს შორის ურთიერთობის დაძაბვის შემდეგ დაიწყო. კოშტა აცხადებს, რომ იტალიელი სპეციალისტი მას პატივისცემით არ ეპყრობა და ურჩევნია ერთი წელი ფეხბურთს მიღმა დარჩეს, ვიდრე კონტესთან მუშაობა გააგრძელოს.