"მანჩესტერ იუნაიტედმა" სეზონისწინა სამზადისში პირველი ამხანაგური შეხვედრა გამართა და "ლოს ანჯელეს გალაქსი" 5:2 დაამარცხა. 'წითელი ეშმაკების" რიგებში რომელუ ლუკაკუს და ვიქტორ ლინდელოფის დებიუტი შედგა. ბელგიელმა თავდამსხმელმა მეორე ტაიმი ითამაშა, თუმცა გოლი არ გაუტანია.
პირველ ტაიმში მარკუს რეშფორდმა ორჯერ გამოიჩინა თავი, მარუანე ფელაინიმ კი თავისი გუნდი შესვენებაზე სამბურთიანი უპირატესობით გაიყვანა. მეორე ნახევარში ორივე გუნდის მხრიდან შემადგენლობები შეიცვალა და ამჯერად ინგლისელთა მხრიდან გოლები ჰენრიხ მხითარიანმა და ანტონი მარსიალმა გაიტანეს, მასპინძელთაგან კი დუბლი ჯოვანი დოს სანტოსმა შეასრულა.
