ჭიდაობა

23:00 | 1.07.2017 | ნანახია [] - ჯერ

ოთხი მედალი ოთხი შესაძლებლიდან

გერმანიის ქალაქ დორტმუნდში, ახალგაზრდა მოჭიდავეთა ევროპის ჩემპიონატზე თავისუფალსა და ქალთა ჭიდაობაში საპრიზო სამეულები სრულად შეივსო. დღეს კი, ხალიჩა ბერძენ-რომაელებს დაეთმოთ და კონტინენტის ჩემპიონ-პრიზიორები რვა წონითი კატეგორიიდან ოთხში შეივსო. საქართველოს ნაკრებს მონაწილე ოთხივე წონაში ჰყავდა და ყველა მედალს დაეუფლა. რამაზ სილაგავა (50 კგ) და ლერი აბულაძე (60 კგ) ევროპოდიუმის უმაღლეს საფეხურზე ავიდნენ. ბექა მამუკაშვილმა (74 კგ) და გიორგი ბარბაქაძემ (96 კგ) კი მესამე საპრიზო ადგილები დაიკავეს.

რამაზ სილაგავამ საჩემპიონო გზაზე მოლდოველი არტემ დელეანუ (7:0), სომეხი აშოტ მხითარიანი (4:1), თურქი ქემალ მუთლუ (14:11) და აზერბაიჯანელი ზულფიგარ ალიევი (5:1) ჩამოიშორა.

ლერი აბულაძემაც ოთხი შეხვედრა ჩაატარა. ფინალამდე რუმინალ ტეოდორ ჰორატაუს (3:1), Bელარუს მაქსიმ ნეჰოდასა (2:1) და სომეხ ჰრაჩა პოღოსიანს (1:1) აჯობა. საჩემპიონო ბრძოლაში კი შვედეთის ნაკრების წევრი არდიტ ფაზლიია (6:4) დაამარცხა.

ბექა მამუკაშვილმა ძირითად ბადეში გამოსვლა მეოთხედფინალში დაასრულა, მომავალ ჩემპიონთან – რუსეთის ნაკრების წევრ ნარეკ ოგანიანთან წაგებით (2:7). იქამდე სერბი ალეკსა ერსკის ძლევა (6:5) მოასწრო. ბრინჯაოს გზაზე კი აზერბაიჯანელ ულვუ განიზადეს (3:1) და უნგრელ დომინიკ გეგენის (5:1) მოუგო.

გიორგი ბარბაქაძემ იტალიელი ლუკა გოდინოსა (2:1) და ბელარუსი ბოპემბე არსენ სიჩევის (6:6) ძლევის შემდეგ, ოქროს მედლისთვის ბრძოლის გაგრძელების შანსი ნახევარფინალში დაკარგა, თურქ სულეიმან ერბაისთან მარცხით (2:6). რეპეშაჟის ფინალში კი შვეიცარიელ დამიან ვონ ეუვს (2:0) აჯობა.

ხვალ ევროპის ჩემპიონატზე მედლების ბოლო ოთხი კომპლექტი გათამაშდება. საქართველოს სახელით ევროკონკურენციაში ნუგზარ წურწუმია (55 კგ), გიორგი კურტანიძე (66 კგ), თემურ ჭკუასელიძე (84 კგ) და ზვიად პატარიძე (120 კგ) ჩაებმებიან.

0.136698