რაღა დარჩა 2 ივლისამდე? ამ დღეს საქართველოში 19-წლამდელთა ევროპის ჩემპიონატი დაიწყება და ფეხბურთის გულშემატკივრებს მოსაწყენად არ ექნებათ საქმე. რამდენიმე ნაკრებზე უკვე დავწერეთ, შემადგენლობები ვინც გამოაცხადა, გაგაცანით - გერმანია, პორტუგალია, ინგლისი... ამჯერად შვედეთზე.
შვედ 19-წლამდელებს კლას ერიქსონი წვრთნის. ისინი ევროპაზე საქართველოსთან ერთად არიან ჯგუფში. ქართულ-შვედური დაპირისპირება მეორე ტურში, 5 ივლისს გაიმართება, მანამდე კი სკანდინავიელები პირველ ტურში ჩეხებს ხვდებიან, ხოლო მასპინძლები -პორტუგალიას.
შვედეთს საქართველოში ვერ მოჰყავს მთავარი დამრტყმელი ძალა - 1999 წელს დაბადებული ფორვარდი ალექსანდრ ისაკი, რომელიც იანვარში აიკ-იდან "დორტმუნდში" გადავიდა. ისაკს "ახალ იბრაჰიმოვიჩს" უწოდებენ, ახალი თაობის უდავოდ საუკეთესო შვედი თავდამსხმელია. წარმოშობით ერითრიელი გახლავთ.
თუმცა კლას ერიქსონს მის გარეშეც კარგი გუნდი ჰყავს. "ჩელსის", "იუვენტუსისა" და "ბაიერნის" მცველებიც არიან... ნაკრები 4-4-2 ტაქტიკური სქემით თამაშობს და ნახევარდაცვაში წამყვან როლს ასრულებს დუშან ჯაიჩი, რომელიც, დიდი ალბათობით, ლონდონის "არსენალში" გააგრძელებს კარიერას.
ამ ნაკრების ბომბარდირია ისაკ ლიდბერგი, რომელმაც 19-წლამდელებში 14 მატჩი ჩაატარა და 10 გოლი მიითვალა. ასე რომ, დორტმუნდელი ისაკი არა, მაგრამ ისაკ ლიდბერგი ჰყავთ.
შემადგენლობაში არაერთ არაშვედურ გვარს ნახავთ, თუმცა ეს გასაკვირი აღარ არის.
მეკარეები: ვიკტორ იოჰანსონი (ასტონ ვილა, ინგლისი), მარკო იოჰანსონი (ტრელებორგი);
მცველები: მატიას ანდერსონი (იუვენტუსი, იტალია), ანტონ კრალი (მალმიო), იოზეფ კოლი (ჩელსი, ინგლისი), ტომას აიშერვუდი (ბაიერნი, გერმანია), ჩარლი ვებერგი (ჰელსინბორგი), სამუელ ადრიანი (მალმიო);
ნახევარმცველები: კარლ იოჰანსონი (კალმარი), ტედი ბერგკვისტი (მალმიო), იოზეფ სისაი (დიურგარდენი), ვიკტორ დიოკერესი (ბრომაპოიკარნა), დუშან ჯაიჩი (ჰამარბი);
ტავდამსხმელები: იესპერ კარლსონი (ელფსბორგი), ისაკ ლიდბერგი (ატვიდაბერგი), ბესარდ საბოვიჩი (დიურგარდენი), მაქს სვენსონი (ჰელსინგბორგი).
ბოლო პერიოდში შვედეთი ხშირად გადის 21, 19 თუ 17-წლამდელთა ფინალურ ეტაპზე. ადრე ახალგაზრდებში მსგავს წარმატებებს ვერ აღწევდნენ, მაგრამ აი, შარშანწინ ევროპის ჩემპიონატი მოიგეს 21-წლამდელებში.
