მსოფლიოს მოქმედმა ჩემპიონმა გერმანიის ნაკრებმა ფიფას კონფედერაციათა თასის გათამაშებაში წარმატებული სტარტი აიღო. ალემანებმა მართალია მძიმე ბრძოლაში შეძლეს ავსტრალიის ძლევა, მაგრამ ისიც საგულისხმოა, რომ იოაჰიმ ლიოვმა რუსეთში გადახალისებული შემადგენლობა იახლა და შეიძლება ითქვას, ექსპერიმენტებს ატარებს.
სოჭის ოლიმპიურ სტადიონზე გამართულ მატჩში კი, ანგარიში მალევე გაიხსნა. გერმანელთა პირველივე გააზრებული შეტევა მიონხენგლადბახის “ბორუსიას” შემტევმა ლარს სტინდლმა გოლით დაასრულა. “ბუნდესნაკრებს” ამის მერეც არ გაუშვია ხელიდან უპირატესობა და რამდენჯერმე შეეძლო გატანა, მაგრამ ტაიმის ბოლოს აქეთ გაუშვა. როგიჩმა შორიდან დაარტყა და ბერნდ ლენო მის დარტყმულს ვერ გაუმკლავდა – 1:1. “კუნგურუების” სიხარული ნაადრევი გამოდგა – 44-ე წუთზე ლეონ გორეცკამ პენალტი მოიპოვა, ხოლო იულიან დრაქსლერს გატანა აღარ გასჭირვებია. შესვენებაზე გერმანია ერთბურთიანი უპირატესობით გავიდა.
მეორე ტაიმში კი, მთავარი მოვლენები საწყის წუთებში განვითარდა. ჯერ იყო და გორეცკამ უკვე თავად შეძლო გატანა, როდესაც ახლო მანძილიდან მეტიუ რაიანს შანსი არ დაუტოვა. ცოტა ხანში კი, ავსტრალიამ სხვაობა შეამცირა – ამჯერად სტანდარტულ სიტუაციას იურიჩის ზუსტი დარტყმ მოჰყვა. საქმეში ვიდეო რეფერი ჩაერია, თუმცა გოლი არ გაუქმებულა. წინ კიდევ ბევრი დრო იყო, მაგრამ გოლი აღარ გასულა და ლიოვმა შედეგით ერთობ გაიხარა.
გერმანია B ჯგუფს ჩილეს ნაკრებთან ერთად ჩაუდგა სათავეში და სწორედ მას ხვდება მეორე ტურში.
ავსტრალია – გერმანია 2:3 (1:2) VIDEO
სოჭი, ოლიმპიური სტადიონი
მაყურებელი: 35 000
ავსტრალია (3-2-4-1): რაიანი; დეგენეკი, სეინსბერი, ვრაიტი; ლონგო (კრუსე 46), მილიგანი; ლეჩკიე, მუი, როგიჩი (ტროიზი 71), ბეჰიჩი; იურიჩი (კეჰილი 86)
მწვრთნელი: ანგე პოსტეჩოღლუ
გერმანია (4-5-1): ლენო; კიმიხი, რუდიგერი, მუესტაფი, ჰექტორი; ბრანდტი (სულე 63), სტინდლი (ჯანი 78), რუდი, გორეცკა, ფრაქსლერი; ვაგნერი (ვერნერი 57)
მწვრთნელი: იოაჰიმ ლიოვი
გოლები: 0:1 სტინდლი (5), 1:1 როგიჩი (41), 1:2 დრაქსლერი (44, პენ), 1:3 გორეცკა (48), 2:3 იურიჩი (56)
გაფრთხილება: სეინსბერი (64) – გორეცკა (55)
სტატისტიკა – კარისკენ დარტყმები: 9 (4) 18 (6) ბურთის ფლობა: 41%-59% კუთხურები: 1:4 თამაშგარე: 1:3
მსაჯი: მარკ გეიგერი (აშშ)
