მიუნხენის “ბაიერნის” ყოფილი მცველი ვილი სანიოლი გერმანულ გრანდში დაბრუნდა. როგორც კლუბის ოფიციალური ვებგვერდი იტყობინება, 40 წლის ფრანგი სპეციალისტი მიუნხენელთა მთავარი მწვრთნელის კარლო ანჩელოტის თანაშემწედ იმუშავებს.

“ანჩელოტი მსოფლიოში ერთ-ერთი საუკეთესო და გამოცდილი მწვრთნელია და ჩემთვის უდიდესი პატივია, მე რომ ამირჩია” - ციტირებს სანიოლის სიტყვებს “ბაიერნის” პრესსამსახური.

ვილი სანიოლი “ბაიერნის” შემადგენლობაში 2000-2009 წლებში თამაშობდა. გუნდთან ერთად ხუთჯერ გახდა გერმანიის ჩემპიონი, ოთხჯერ თასის მფლობელი, თითოჯერ ჩემპიონთა ლიგისა და საკონტინენტთაშორისო თასის გამარჯვებული. სამწვრთნელო საქმიანობა 2013 წელს საფრანგეთის 21-წლამდელთა ნაკრებში დაიწყო, 2014 წლიდან “ბორდოს” თავკაცი იყო, საიდანაც 2016 წლის მაისში არადამაკმაყოფილებელი შედეგების გამო დაითხოვეს.