მსოფლიოს 20-წლამდე ჩემპიონატზე ჯგუფური ეტაპის დასრულებამდე ერთი დღე დარჩა. შესაბამისად, მერვედფინალში გამსვლელ გუნდთა უმეტესი ვინაობა უკვე ცნობილია. პლეი-ოფში თამაში უკვე გაინაღდეს იტალიამ, პორტუგალიამ, იაპონიამ და კოსტა რიკამ.
C ჯგუფი
პორტუგალიის ნაკრებს ქვეჯგუფიდან გასასვლელად ერთადერთი გზა ჰქონდა დარჩენილი: გამარჯვება - პატარა ლუზიტანებმა პირველ-ორ მატჩში მაინც და მაინც კარგი შთაბეჭდილება ვერ დატოვეს და ამიტომაც, ირანის ნაკრების დამარცხება აუცილებლად სჭირდებოდა. თავის მხრივ, აზიელებსაც ქულები ჰაერივით უნდოდა და ფიცხელი ბრძოლა შედგა. თავიდან ირანის ნაკრები დაწინაურდა და კარგა ხანს ინარჩუნებდა უპირატესობას, მაგრამ მეორე ტაიმში ევროპელებმა თავისი მაინც გაიტანეს - გამარჯვების გოლი საერთოდ, 86-ე წუთზე გავიდა. შედეგად პორტუგალია მეორე ადგილით უკვე 1/8 ფინალშია, ხოლო ირანის ნაკრები ჯგუფში ჩარჩა.
არადა, ირანს მესამე ადგილით შანსი ექნებოდა, მაგრამ უმოტივაციო ზამბიამ კოსტა რიკას თავი არ შეაკლა, წააგო და ჩრდილოეთ ამერიკელებს დარჩათ მესამე პოზიცია - კოსტა რიკა უკვე პლეი-ოფშია.
პორტუგალია - ირანი 2:1 (0:1)
გოლები: 0:1 შექარი (4), 1:1 გონსალვეში (54), 2:1 სილვა (86)
კოსტა რიკა - ზამბია 1:0 (1:0)
გოლი: დალი (15)
| 1. | ზამბია U20 | 3 | 2 | 0 | 1 | 6:4 | 6 | |
| 2. | პორტუგალია U20 | 3 | 1 | 1 | 1 | 4:4 | 4 | |
| 3. | კოსტა რიკა U20 | 3 | 1 | 1 | 1 | 2:2 | 4 | |
| 4. | ირანი U20 | 3 | 1 | 0 | 2 | 4:6 | 3 |
D ჯგუფი
ურუგვაის ნაკრებმა პლეი-ოფში აპსარეზობა ჯერ კიდევ მეორე ტურში გაინაღდა და ამიტომაც, სამხრეთ აფრიკის ნაკრებთან გადახალისებული შემადგენლობით ითამაშა. საბოლოოდ ორივე გუნდი კმაყოფილი დარჩა: ურუგვაიმ წაუგებლად დაასრულა ჯგუფური ეტაპი, ხოლო აფრიკელებმა ტურნირზე პირველი ქულა მოიპოვეს.
D ჯგუფიდან იტალიის ნაკრებიც გავიდა. „სკუადრა აძურას“ იაპონიასთან ქულაც აძლევდა ხელს და თამაში ისეთი შემართებით დაიწყო, იფიქრებით, აზიელებს გაანადგურებსო. მეშვიდე წუთისთვის აპენინელები რიკარდო ორსოლინიმ და პანიკომ ორჯერ აიღეს იაპონიის კარი. თუმცა შემდეგ მოეშვნენ და ორი გოლი თავის კარში მიიღეს - დოანიმ დუბლი გაიფორმა.
საბოლოოდ, იტალიამ და იაპონიამ 4-4 ქულით დაასრულეს ჯგუფური ტურნირი, მაგრამ ბურთების უკეთესი ბალანსის გამო მეორე ადგილი ევროპელებს ერგოთ. იაპონიაც მერვედფინალშია, როგორც ერთ-ერთი საუკეთესო მეორეადგილოსანი.
ურუგვაი - სამხრეთ აფრიკა 0:0 (0:0)
იაპონია - იტალია 2:2 (1:2)
გოლები: 0:1 ორსოლინი (4), 0:2 პანიკო (7), 1:2 დოანი (22), 2:2 დოანი (50)
| 1. | ურუგვაი U20 | 3 | 2 | 1 | 0 | 3:0 | 7 | |
| 2. | იტალია U20 | 3 | 1 | 1 | 1 | 4:3 | 4 | |
| 3. | იაპონია U20 | 3 | 1 | 1 | 1 | 4:5 | 4 | |
| 4. | სამხრეთ აფრიკა U20 | 3 | 0 | 1 | 2 | 1:4 | 1 |
მსოფლიოს 20-წლამდე ჩემპიონატზე ჯგუფური ეტაპი 28 მაისს, დასრულდება. მატჩები E და F ჯგუფებში გაიმართება.
აქვე, გთავაზობთ მესამე ადგილოსანთა სატურნირო მდგომარეობას ამ დროისთვის:
| 1. | კოსტა რიკა U20 | 3 | 1 | 1 | 1 | 2:2 | 4 | |
| 2. | იაპონია U20 | 3 | 1 | 1 | 1 | 4:5 | 4 | |
| 3. | გერმანია U20 | 3 | 1 | 1 | 1 | 3:4 | 4 | |
| 4. | არგენტინა U20 | 3 | 1 | 0 | 2 | 6:5 | 3 | |
| 5. | საუდის არაბეთი U20 | 2 | 1 | 0 | 1 | 2:3 | 3 | |
| 6. | ვიეტნამი U20 | 2 | 0 | 1 | 1 | 0:4 | 1 |
