ზაფხულის მოახლოებულ სატრანსფერო პერიოდში ერთ-ერთი ყველაზე აქტუალური საკითხი 18 წლის ფრანგი ფორვარდის კილიან მბაპეს მომავალი რომ იქნება, კარგა ხანია ცხადია. წლევანელი სეზონის აღმოჩენა ფაქტობრივად ყველა წამყვანი ევროპული კლუბის ინტერესის ობიექტია და თვის დასაწყისში გავრცელებული ინფორმაციის მიუხედავად, რომ მბაპეს “რეალში” გადასვლა გადაწყვეტილია, მონაკოელთა მოთაფვლის მცდელობები არ წყდება.

ამჯერად “მონაკომ” ინგლისური “ლივერპულის” 70-მილიონიან წინადადებაზე თქვა უარი, ისევე, როგორც მანამდე “მანჩესტერ იუნაიტედი” გაისტურმა. პასუხიც უცვლელია - კლუბი ფეხბურთელს 100 მილიონ ევროზე ნაკლებად არ დათმობს.

ახალგაზრდა თანამემამულის ირგვლივ შექმნილ აჟიოტაჟს “მონაკოსა” და საფრანგეთის ნაკრების ყოფილი თავდამსხმელი დავიდ ტრეზეგე ეხმაურება, მბაპეს “მონაკოში” დარჩენას ურჩევს და ენტონი მარსიალის მაგალითსაც ახსენებს, რომელმაც მონაკოელთა რიგები ასევე მცირე ასაკში დატოვა და “მანჩესტერს” მიაშურა, თუმცა ინგლისში მისი კარიერა ისე არ წარიმართა, როგორც ელოდნენ.

“მბაპეს ყველა მონაცემი აქვს, უდიდესი ფორვარდი რომ გახდეს, მაგრამ არ უნდა დაგვავიწყდეს, რომ ის ჯერ მხოლოდ 18 წლისაა. ვიმედოვნებ, “მონაკოში” დარჩება, თავისი საუკეთესო თვისებების წარმოჩენას გააგრძელებს და როგორც ფეხბურთელი, სტაბილურად შეძლებს თვითდამკვიდრებას. ყველას გვსურს “რეალში”, “ბარსელონაში” ან “იუვენტუსში” თამაში, მაგრამ სხვა ქვეყანაში გადასვლისას ბევრ სირთულეს ვაწყდებით, რაც მცირე ასაკის გათვალისწინებით იოლი დასაძლევი არაა. ამის ნათელი მაგალითია მარსიალი. დიახ, მბაპეს ყველა საჭირო თვისება აქვს, მაგრამ კიდევ ერთი წელი “მონაკოში” მას უფრო ძლიერს გახდის” - მიიჩნევს ტრეზეგე.