მადრიდის “რეალის” ფორვარდმა კრიშტიანუ რონალდუმ “სამეფო კლუბის” მაისურით გატანილი გოლების რაოდენობა 400-მდე გაზარდა და მადრიდელთა ისტორიაში საუკეთესო ბომბარდირობა კიდევ უფრო გაიმყარა.

ამასთან, რონალდუ ჩემპიონთა ლიგის ნახევარფინალის პირველ მატჩში “ატლეტიკოს” კარში გატანილი სამი გოლის შემდეგ, პირველი ფეხბურთელი გახდა, რომელმაც ევროპის ყველაზე პრესტიჟული საკლუბო ტურნირის პლეი ოფის ზედიზედ ორ მატჩში ჰეთ-თრიქის შესრულება შეძლო. პორტუგალიელმა მეოთხედფინალის საპასუხო შეხვედრაში “ბაიერნსაც” სამი გოლი გაუტანა. საერთო ჯამში, “რეალის” შემტევს ჩემპიონთა ლიგაში უკვე შვიდჯერ აქვს შესრულებული ჰეთ-თრიქი და ამ მაჩვენებლით ის “ბარსელონას” მეგოლეს ლიონელ მესის გაუთანაბრდა.

გარდა ამისა, კრიშტიანუ ჩემპიონთა ლიგის ისტორიაში კიდევ ერთი მიღწევით შევიდა, მას ამ ტურნირის ნახევარფინალურ ეტაპზე უკვე 12 გოლი დაუგროვდა, რითაც “რეალის” ლეგენდარული ფეხბურთელის ალფრედო დი სტეფანოს რეკორდი (11 გოლი) გააუმჯობესა.

“რეალმა” გუშინ, კრიშტიანუს სამი გოლით, თანაქალაქელი “ატლეტიკო” “სანტიაგო ბერნებეუზე” 3:0 დაამარცხა (VIDEO) და ჩემპიონთა ლიგის ფინალისკენ უდიდესი ნაბიჯი გადადგა.