ძიუდოისტებმა საერთაშორისო კალენდარში ევროპის ჩემპიონატამდე შეტანილი საერთაშორისო ტურნირები თურქეთში მოილიეს. 7-9 აპრილს, ანტალიაში გამართულ გრან პრიზე 34 ქვეყნის ნაკრებმა მიიღო მონაწილეობა. ევროპირველობამდე ორ კვირაზე ნაკლები რჩება და მოლოდინისამებრ, წონითი კატეგორიების ლიდერებმა და მომავალ შეჯიბრებაზე ფავორიტებად მიჩნეულმა ძიუდოისტებმა ზედმეტ მგზავრობას და დატვირთვას თავი აარიდეს. ანალოგიური გადაწყვეტილება მიიღო საქართველოს ნაკრების ხელმძღვანელობამაც. მთავარი მწვრთნელი ირაკლი ცირეკიძე ევროგანაცხადში შეყვანილ შეგირდებს წინასაჩემპიონატო დასკვნითი შეკრებაზე ავარჯიშებს. თურქულ გრან პრიზე კი საქართველოდან ნაკრების მხოლოდ სამი კანდიდატი ჩავიდა და სამივე საპრიზო სამეულს მიღმა დარჩა.

პოდიუმზე ასვლის ყველაზე რეალური შანსი 81 კილოგრამ წონით კატეგორიაში მოჭიდავე თამაზ კირაკოზაშვილმა ვერ გამოიყენა - საქართველოს მოქმედი ჩემპიონი რუმინელი ვლად ვისანის, თურქი ილკერ გულდურენისა და უნგრელი ლასლო ჩოკნიაის ძლევის შემდეგ, ნახევარფინალში რუს შტანისლავ სემენოვთან დამარცხდა და "ბრინჯაოს ფინალში” გადაერთო, სადაც მონღოლ დაგვასურენ ნიამსურენთან ორ წუთში სამი გაფრთხილება მიიღო და მე-5 ადგილს დასჯერდა.

საქართველოს სახელით ანტალიურ ტატამზე ლაშა ჩადუნელი (60 კგ) და დავით ოზბეთელაშვილიც (100 კგ) გავიდნენ, მაგრამ მედლისთვის ბრძოლის გაგრძელების შანსი საწყის ეტაპზე დაკარგეს.

ჩადუნელმა პირველსავე მეტოქესთან – სამხრეთკორეელ ჰიოჯუნ კიმთან წააგო. ოზბეთელაშვილმა კი გრან პრი ებრაელ იაკობ მამისთვალოვის ძლევით გახსნა და მეორე წრეში მსოფლიოს 2009 წლის ჩემპიონთან – ყაზახ მაქსიმ რაკოვთან დამარცხდა.

ევროპის ჩემპიონატი პოლონეთის დედაქალაქ ვარშავაში 20-23 აპრილს გაიმართება.

ძიუდო

გრან პრი

ანტალია

7-9 აპრილი

მამაკაცები

60 კგ

1 გუსმან კირგიზბაიევი (ყაზახეთი)

2 ბექირ ოზლუ (თურქეთი)

3 ამარტუვშინ ბაიარაა (მონღოლეთი)

3 აჰმეთ შაჰინ კაბა (თურქეთი)

66 კგ

1 აბდულა აბდულჯალილოვი (რუსეთი)

2 ბეკტურ რისმამბეტოვი (ყირგიზეთი)

3 ტუმურხულეგ დავაადორჟი (მონღოლეთი)

3 ბარუჩ შმაილოვი (ისრაელი)

73 კგ

1 მირზოხიდ ფარმონოვი (უზბეკეთი)

2 ჰასან ვანლიოღლუ (თურქეთი)

3 ტოჰარ ბუტბული (ისრაელი)

3 ჰიდაიატ ჰეიდაროვი (აზერბაიჯანი)

81 კგ

1 სტანისლავ სემენოვი (რუსეთი)

2 მინკი სონგი (სამხრეთ კორეა)

3 მურატ ხაბაჩიროვი (რუსეთი)

3 დაგვასურენ ნიამსურენი (მონღოლეთი)

5 თამაზ კირაკოზაშვილი (საქართველო)

90 კგ

1 ალტანბაგანა განტულგა (მონღოლეთი)

2 კომრონსოხ უსტოპირიონი (ტაჯიკეთი)

3 ალეკსანდარ კუკოლჟი (სერბეთი)

3 მაგომედ მაგომედოვი (რუსეთი)

100 კგ

1 ადლან ბისულტანოვი (რუსეთი)

2 მაქსიმ რაკოვი (ყაზახეთი)

3 ნიაზ ილიასოვი (რუსეთი)

3 ელხან მამადოვი (აზერბაიჯანი)

+100 კგ

1 ლუკაშ კრპალეკი (ჩეხეთი)

2 იური კრაკოვეცკი (ყირგიზეთი)

3 ზარკო კულუმი (სერბეთი)

3 მუსა ტუმენოვი (რუსეთი)