ლეგენდარულმა არგენტინელმა ფეხბურთელმა გაბრიელ ომარ ბატისტუტამ განაცხადა, რომ “ალბისელესტეს” დღევანდელი შემადგენლობის ნახევარი მას არც კი ესალმება. მისი თქმით, როდესაც გუნდის გასახდელში შევიდა, გაკვირვებული დარჩა.

“არგენტინის ნაკრების გასახდელში შევედი და ველოდი, რომ მომესალმებოდნენ, არა იმიტომ, რომ გაბრიელ ბატისტუტა ვარ, არამედ იმიტომ, რომ ამ ქვეყნის ნაკრების მაისურით მითამაშია. თუმცა, ნახევარმა გუნდმა ჩემი იქ ყოფნა არ შეიმჩნია. არ ვფიქრობ, რომ ეს პატივისცემის არქონის გამო გააკეთეს. უბრალოდ, ასე გადაწყვიტეს.

არგენტინის ნაკრებმა ბოლო პერიოდში სამი ფინალი ითამაშა და ეს ცოტა არაა, მაგრამ ფეხბურთელები ხალხთან ახლოს არ არიან. ჩვენს დროს ვიქცეოდით ისე, როგორც უბრალო მოკვდავები და ხალხი ამას გრძნობდა”, - უთხრა ბატისტუტამ Tys Sport-ს.

გაბრიელ ომარ ბატისტუტა 90-იანი წლების გამორჩეული ფორვარდი იყო. არგენტინის ნაკრების რიგებში მან 1991-2002 წლებში 78 მატჩში 56 გოლი გაიტანა.