ზაზა ფაჩულიას “გოლდენ სტეიტმა” გასვლაზე “ფინიქს სანსი” 120:111 დაამარცხა. ზაზა ტრადიციულად სასტარტო 5-ეულში იმყოფებოდა და პარკეტზე 18 წუთი დაჰყო. ამ დროში ფაჩულიამ გუნდს 4 ქულა, 3 მოხსნა, 2 პასი და ერთი ბლოკ-შოტი შესძინა. ქართველმა ცენტრმა 4-დან ორი ორქულიანი ჩააგდო და საჯარიმო ხაზთან არ დამდგარა.

რაც შეეხება უშუალოდ შეხვედრას, მატჩის ბედი პირველსავე პერიოდში გადაწყდა - “მეომრებმა 41:18 მოიგეს, შემდეგ მთელი შეხვედრა “ფინიქსი” ჩამორჩენის აღმოფხვრას ცდილობდა, სხვაობა სამ ქულამდეც შეამცირა, მაგრამ ანგარიშის გათანაბრება ან წინ გასვლა ვერ მოახერხა.

მატჩის საუკეთესო მოთამაშე უდაოდ სტეფ კარი გახლდათ, რომელმაც გუნდს 42 ქულა, 11 პასი, 5 მოხსნა, 2 ჩაჭრა და ორი ბლოკ-შოტი შესძინა. კლეი ტომპსონმა მეტოქეს 22 ქულა ჩაუგდო. “ფინიქსში” 21 ქულით ბუკერი გამოირჩა.

“გოლდენ სტეიტი” 65 მოგებით და 14 მარცხით დასავლეთ კონფერენციას ლიდერობს. “მეომრები” მომდევნო შეხვედრაში შინ “ნიუ ორლეანის” წინააღმდეგ ჩაატარებენ, მატჩი 9 აპრილს, თბილისის დროით 06:30 საათზე დაიწყება.