“მონაკოს” და კოლუმბიის ნაკრების თავდამსხმელს რადამელ ფალკაოს მიმდინარე სატრანსფერო ფანჯრის პერიოდში ჩინური კლუბები ეპატიჟებოდნენ, თუმცა “ელ ტიგრემ” აზიაში გადაბარგებაზე უარი განაცხადა – იუწყება ცნობილი გამოცემა Goal.com–ი.

30 წლის თავდამსხმელს ჩინეთიდან სამი წინადადება ჰქონდა და ზღაპრულ ხელფასს სთავაზობდნენ, თუმცა “მონაკოში” დარჩენა ამჯობინა და ამის მიზეზებზე ისაუბრა.

“ასეთი წინადადებების უარყოფა ადვილი არაა. სამჯერ შემეძლო ჩინეთში წასვლა, მაგრამ უარი ვთქვი. მჯერა, რომ ასევე ძალიან რთულია კლუბისთვის ამხელა ფულზე უარის თქმა.

თუმცა, აქ თავს ბედნიერად ვგრძნობ და ეს ყველაზე მნიშვნელოვანია. მსურს, რომ “მონაკოსთვის” ბოლომდე დავიხარჯო და გამარჯვებებს მივაღწიო” – განუცხადა ფალკაომ L’Equipe–ს.

ბოლოსკენ კოლუმბიელს ჰკითხეს, ჩინეთში წასვლისგან თავის შეკავების ერთ-ერთი მიზეზი იყო თუ არა ნაკრების ფაქტორი, რაზეც მან უპასუხა: “არა, მწვრთნელი იძახებს იმ მოთამაშეებს, რომლებიც ჩინეთში თამაშობენ. მაგრამ, ჩემი ოცნება “მონაკოსთან” ერთად ტიტულების მოგებაა”, – დაასრულა საუბარი “ელ ტიგრემ”.

ფალკაომ მიმდინარე სეზონში “თავადების” მაისური 22-ჯერ მოირგო და 18 გოლი გაიტანა.