სუმოს უმაღლეს მაკუუჩი დივიზიონში მოჭიდავე ქართველი სეკიტორებისთვის იანვრის ბაშო წარუმატებლად გრძელდება. სუპერტურნირის ერთი მესამედის – 5 ტურის შემდეგ თეიმურაზ ჯუღელის (გაგამარუს) ანგარიშზე ერთადერთი ქულაა. ლევან გორგაძეს (ტოჩინოშინი) კი მიმდინარე შეჯიბრებაზე ჯერ არ მოუგია.

კომუსუბის რანგში მოჭიდავე ტოჩინოშინი დღეს გამართულ მე-5 ტურში სეკივაკე შოდაისთან დამარცხდა და თან, მარჯვენა მუხლის ტრავმაც მიიღო. ბაშოს მიმომხილველი ვებ-გვერდების ინფორმაციით, ქართველ სეკიტორს დღესვე ჩაუტარებენ სამედიცინო გამოკვლევას და შემდეგ გაირკვევა, შეძლებს თუ ვერა გორგაძე შემდგომ ტურებში ჭიდაობას.

გაგამარუმ მე-13 მაეგაშირა იჩინოჯოსთან წააგო და სამქულიანი უარყოფითი ბალანსით აგრძელებს ჭიდაობას.

ხვალ გასამართ მე-6 ტურში ტოჩინოშინი კომუსუბი ტაკაიაშუს უნდა დაუპირისპირდეს, რომელთანაც აქამდე გამართული 11 შეხვედრიდან 6 მოუგია. გაგამარუს მეტოქე კი ოშუნაარასი იქნება. ურთიერთშეხვედრების სტატისტიკა თანაბარია – 3:3.