მადრიდის „რეალის“ ნახევარმცველი ლუკა მოდრიჩი ხორვატიის წლის საუკეთესო ფეხბურთელად მეხუთედ აღიარეს.
არჩევანი ექსპერტებისა და ყოფილი ფეხბურთელებისგან შემდგარმა კომისიამ გააკეთა და ხორვატიის ეროვნული ნაკრების კაპიტანმა სარეკორდო რაოდენობის ქულები დააგროვა - 110. ამ გამოკითხვის არსებობის 45-წლიან ისტორიაში ამდენივე ქულა მხოლოდ ერთხელ, ფორვარდმა დადო პრშომ მოაგროვა.
„ამ ჯილდოს ჩემს გულში განსაკუთრებული ადგილი უჭირავს, რადგან ის იყო პირველი დიდი ჯილდო, რომელიც ჩემს კარიერაში მოვიპოვე“ - განაცხადა 31 წლის ფეხბურთელმა, რომელიც საუკეთესოდ პირველად 2007 წელს აღიარეს.
მოდრიჩზე ერთით მეტჯერ ხორვატიის საუკეთესო ფეხბურთელი დავორ შუკერი გამხდარა და ნახევარმცველი იმედოვნებს, რომ კარიერის დასრულებამდე ლეგენდარული ხორვატის მიღწევის გამეორებას შეძლებს:
„შუკერთან გათანაბრება და მისი გადასწრება კარგი იქნებოდა. უმაღლეს დონეზე კიდევ რამდენიმე წელი ვაპირებ თამაშს და ამის შანსი აუცილებლად მექნება, თუმცა რეკორდის დამყარებაზე არასდროს მიფიქრია“.
