იაპონიაში პროფესიული სუმოს 2017 წლის სეზონი ოფიციალურად გაიხსნა. მეორე დღეა, ტოკიო წლის პირველ ბაშოს მასპინძლობს და გასული სუპერტურნირების მსგავსად, უმაღლეს მაკუუჩი დივიზიონში კვლავ ორი ქართველი სეკიტორი გამოდის - ტოჩინოშინის შიკონათი ცნობილი ლევან გორგაძე და გაგამარუდ წოდებული თეიმურაზ ჯუღელი.

ორი ტურის შემდეგ, მე-13 მაეგაშირას რანგში მოჭიდავე გაგამარუს ანგარიშზე თითო მოგება-წაგებაა. მე-12 მაეგაშირა დაიშომარუსთან განცდილი სასტარტო მარცხის შემდეგ, დღეს მან ასევე მე-12 მაეგაშირა ტაკაკეიშოს აჯობა.

ლევან გორგაძემ 2016 წლის ნოემბრის ბაშო შთამბეჭდავი დადებითი ბალანსით (10:5) დაასრულა და ახალ სეზონს კომუსუბის წოდებით შეხვდა, მაგრამ მიმდინარე შეჯიბრზე ჯერ არაფერი გამოსდის. გუშინ იმპერატორის თასის მფლობელ იოკოძუნასთან - კაკურიუსთან დამარცხდა. დღეს კი კიდევ ერთ თავისზე მაღალრეიტინგიან მეტოქესთან – ოძეკი გოეიდოსთან დაკარგა პირველი ქულის აღების შანსი.

მესამე ტურის შეხვედრები ხვალ შედგება. ტოჩინოშინი ოძეკი კოტოშოგიკუს დაეჭიდება. გაგამარუ კი გაცილებით დაბალრეიტინგიანი მოწინააღმდეგის - ჩიოიოს პირისპირ დადგება.