მოჭადრაკე ქალთა შორის მორიგ მსოფლიო ჩემპიონატს, რომელიც ნოკაუტ სისტემით ჩატარდება, მიმდინარე წლის ათი თებერვლიდან ხუთი მარტის ჩათვლით ირანის დედაქალაქი თეირანი უმასპინძლებს. აღნიშნულ ტურნირში 62 მოჭადრაკე მონაწილეობს. მათ შორის 7 ქართველია. ესენი არიან: სალომე მელია, ნანა ძაგნიძე, ნინო ბაციაშვილი, ლელა ჯავახიშვილი, ნინო ხურციძე, ბელა ხოტენაშვილი და სოფო გურამიშვილი. ამ მოჭადრაკეებმა მსოფლიო ჩემპიონატზე მონაწილეობის უფლება 2014-2015 წლების ევროპის ინდივიდუალურ პირველობაზე მოიპოვეს.

გამარჯვებული რამდენიმე თვეში 2015-2016 წლების გრან-პრის გამარჯვებულ ცზიუ ვენცზიუნს (ჩინეთი) შეხვდება. თუ ირანში პირველ ადგილზე ვენცზიუნი გავიდა, მაშინ იგი გრან-პრის ბოლო ტურნირის მეორე ადგილოსან ჰამპი კონერუს (ინდოეთი) დაუპირისპირდება.