ტურინის “იუვენტუსმა” 2017-2018 წლების სეზონისთვის გაძლიერება უკვე დაიწყო. იტალიური მედიის ცნობით, “ბებერი ქალბატონის” რიგებს ბერგამოს “ატალანტას” ნიჭიერი ცენტრალური მცველი მატია კალდარა შეავსებს.

აპენინელი ჟურნალისტების თქმით, მხარეებს შორის შეთანხმება მიღწეულია და 22 წლის მატია “იუვესთან” კონტრაქტს იანვარში ოფიციალურად გააფორმებს. თუმცა, კალდარა მიმდინარე სეზონს “ატალანტაში” ჩაამთავრებს, მეტი სათამაშო პრაქტიკის მისაღებად. ამავდროულად, არაა გამორიცხული, რომ საიჯარო ხელშეკრულება კიდევ გაგრძელდეს და კალდარა ბერგამოში მომავალ სეზონშიც ვიხილოთ. ყველაფერი იმაზე იქნება დამოკიდებული, როგორ ფორმაში იქნებიან “იუვენტუსის” ვეტერანი მცველები ანდრეა ბარძალი და ჯორჯო კიელინი. რაც შეეხება სატრანსფერო ღირებულებას – “ატალანტა” 15 მილიონ ევროს მიიღებს და ხელშეკრულებაში ბონუსებიც იქნება გათვალისწინებული.

მატია კალდარა სერია A-ში პირველ სეზონს ატარებს და 11 ჩატარებულ მატჩში, პოზიციის მიუხედავად, სამი გოლის გატანა უკვე მოახერხა. აღსანიშნავია, რომ ფეხბურთელზე დიდი იმედი მყარდება და მისთვის “მილანი” და “ინტერიც” იბრძოდნენ, თუმცა როგორც ჩანს “იუვენტუსმა” უფრო მეტად მოინდომა და ფეხბურთელი გაიფორმა.