რამდენიმე დღის წინ ბრაზილიის სერია A-დან “ინტერნასიონალი” გავარდა – ეს პირველი დავქეითება იყო ბელუ ორიზონტული გუნდის ისტორიაში ქვედა ლიგაში. საინტერესოა, გავიგოთ თუ რამდენი კლუბი არაა არასდროს გავარდნილი ამა თუ იმ ქვეყნის უმაღლესი დივიზიონიდან... რადგან “ინტერნასიონალი” ვახსენეთ, დავიწყოთ ბრაზილიიდან:

“კრუზეირო” – ერთადერთი ბრაზილიური გუნდი, რომელსაც სეზონში ჰეთ-თრიქი აქვს შესრულებული: 2003 წელს მან ბრაზილიის ჩემპიონატი, თასი და შტატის ჩემპიონატი მოიგო. “კრუზეირო” ქვედა ლიგაში არასდროს გავარდნილა.

“ფლამენგო” – რიო დე ჟანეიროს გუნდს ყველაზე დიდი ქომაგთა არმია ჰყავს სამშობლოში (35 მილიონამდე გულშემატკივარი). თავის ისტორიაში “ფლამ” 33-ჯერ მოიგო ქვეყნის ჩემპიონატი და ერთხელ კოპა ლიბერტადორესი.

“სანტოსი” – პელეს გუნდს ბრაზილიის ჩემპიონობა 22-ჯერ მოუპოვებია, ხოლო 3-ჯერ მოიგო კოპა ლიბერტადორესი. “სანტოსიც” ჯერ არ გავარდნილა.

“სან პაულუ” – “სან პაულუს” სამშობლოში 27 მილიონამდე ქომაგი ჰყავს და ამ მხრივ მესამეა. ქვეყნის ჩემპიონი 21-ჯერ გამხდარა “სან პაულუ”, 3 გზის ლიბერტადორესის თასი მოიგო, ხოლო ერთხელ მსოფლიოს საკლუბო ჩემპიონატი.

არგენტინა

“ბოკა ხუნიორსი” – “ბოკა” ერთადერთია არგენტინაში, რომელსაც მთავარი ლიგა არასდროს დაუტოვებია. დედაქალაქურმა კლუბმა შიდა ჩემპიონატი 31-ჯერ მოიგო, ხოლო ლიბერტადორესის თასზე გამარჯვება 6-ჯერ მოიპოვა.

ჩილე

“კოლო კოლო” – ჩილეს ყველაზე ტიტულოვანი გუნდი პირველი დივიზიონიდან არ გავარდნილა. “კოლო კოლო” ჩილეს ჩემპიონი 31-ჯერ გახდა, ყველაზე დიდ წარმატებას კი, 1991 წელს მიაღწია, როდესაც კოპა ლიბერტადორესი მოიგო.

ეკვადორი

“ბარსელონა” – ეკვადორში საფეხბურთო კლუბი “ბარსელონა” 1925 წელს დაარსდა და თითქმის საუკუნოვან ისტორიაში ქვედა ლიგის გემო არ გაუსინჯავს. ეს კლუბი ეკვადორის ჩემპიონი 14-ჯერაა, ხოლო ორჯერ კოპა ლიბერტადორესის ფინალში წააგო.

ურუგვაი

“ნასიონალი” – მონტევიდეოს “ნასიონალიც” არასდროს დაქვეითებულა. ჩემპიონის 41 ტიტული, 3 ლიბერტადორესის თასი და ამდენივე საკონტინტეთაშორისო თასი - ასეთია “ნასიონალის” მონაგარი.

“პენიაროლი” – თუ ურუგვაიზე და “ნასიონალზე” ვსაუბრობთ, იქ “პენიაროლიც” უნდა ვახსენოთ. მონტევიდეოს კიდევ ერთი გუნდი, რომელიც ასევე არ გავარდნილა. “პენიაროლს” ურუგვაის 45 საჩემპიონო ტიტული, 5 ლიბერტადორესის თასი და 3 საკონტინტეთაშორისო თასი აქვს.

შოტლანდია

“აბერდინი” – სამხრეთამერიკიდან ევროპაში გადმოვინაცვლოთ. შოტლანდიაში “აბერდინს” დიდი ისტორია აქვს. ამ გუნდს ერთი პერიოდი ლეგენდარული სერ ალექს ფერგიუსონი წვრთნიდა. “აბერდინი” თავის 113 წლიან ისტორიაში არასდროს გავარდნილა. ქვეყნის ჩემპიონობა კი, ოთხჯერ მოიპოვა.

“სელტიკი” – “სელტიკი” არის კიდევ ერთი სქოთური გუნდი, რომელზეც იგივეს თქმა შეგვიძლია. გლაზგოელებს ქვეყნის ჩემპიონის 47 ტიტული აქვთ მოპოვებული, ერთხელ კი, ჩემპიონთა თასიც მოიგეს.

ჰოლანდია

“აიაქსი” – რა გასაკვირია, რომ “აიაქსს” ერედივიზიონი ჯერაც არ დაუტოვებია. ამსტერდამულმა გრანდმა ჰოლანდიის ჩემპიონატი 33-ჯერ მოიგო, 18-ჯერ ქვეყნის თასი, ხოლო 8-ჯერ სუპერთასი. “აიაქსს” 4 გზის ჩემპიონთა თასიც აქვს მოგებული და მსოფლიოში სახელგანთქმული საფეხბურთო სკოლა აქვს.

“ფეიენოორდი” – როტერდამის “ფეიენოორდი” 1908 წელს დაარსდა და მას შემდოგმ ყოველთვის ჰოლანდიურ ელიტაშია. ქვეყნის ჩემპიონის 14 ტიტული, 1 ჩემპიონთა თასი და ერთიც საკონტინტეთაშორისო თასი მოუგია.

“პსვ ეინდჰოვენი” – პსვ-მ 1988 წელს ისტორიული ჰეთ-თრიქი შეასრულა. სწორედ ამ დროს მოიგეს “ფილიპსელებმა” ისტორიული ტიტული: ჩემპიონთა თასი. “ეინდჰოვენი” ჰოლანდიის ჩემპიონი 23-ჯერ გამხდარა.

“უტრეხტი” – ბევრისთვის გასაკვირად ერედივიზონი არასდროს დაუტოვებია “უტრეხტს”. 1970 წელს შექმნილ კლუბს ქვეყნის ჩემპიონობა არ მოუპოვებია, მაგრამ სამჯერ მოიგო ჰოლანდიის თასი და ერთხელ სუპერთასი.

თურქეთი

“ბეშიქთაში” – თურქეთის მთავარი ლიგიდან სამი სტამბულური გუნდი არ გავარდნილა. ერთ-ერთია “ბეშიქთაში”. “არწივებს” ქვეყნის ჩემპონობა 14-ჯერ უზეიმიათ, 9 გზის მოიგეს თასი და რვაჯერ სუპერთასი.

“ფენერბაჰჩე” – მათ რიგებშია “ფენერბაჰჩეც” – “ფენერმა” ქვეყნის ჩემპიონობა 19-ჯერ მოიპოვა, ქვეყნის თასი ექვსჯერ, ხოლო სუპერთასი ცხრაჯერ.

“გალათასარაი” – და რა თქმა უნდა, “გალათასარაი”, თურქეთის ყველაზე ტიტულოვანი გუნდი. 20 ქვეყნის ჩემპიონის ტიტული, 15 სუპერთასი, 17 ქვეყნის თასი, ერთი უეფას თასი და ამდენივე ევროპის სუპერთასი.

საბერძნეთი

“ოლიმპიაკოსი” – ეს, ის გუნდია, რომელიც საბერძნეთში ყველაზე პოპულარულია და ტიტულოვანიც. პირეოსელები რა თქმა უნდა, არასდროს გავარდნილან. ტიტულებს რაც შეეხება – 43 ქვეყნის ჩემპიონობა, 27 თასი და 3 სუპერთასი.

“პანათინაიკოსი” – “ოლიმპიაკოსის” შემდეგ მოდის “პანათანაიკოსი”: 20 ჩემპიონობა, 18 თასი და 3 სუპერთასი.

“პაოკი” – საბერძნეთის ელიტარული ლიგა არასდროს დაუტოვებია არც სალონიკის “პაოკს” – ტიტულების მხრივ კი, ამ გუნდის მონაგარი მოკრძალებულია: 4 საბერძნეთის თასი და 2 ჩემპიონობა.

გერმანია

“ჰამბურგი” – ეს კლუბი 1887 წელს დააარსდა და დღემდე ერთადერთი გერმანული გუნდია, რომელიც არ გავარდნილა. “ჰამბურგმა” 6-ჯერ მოიგო ბუნდესლიგა, სამჯერ გერმანიის თასი და ერთხელ ჩემპიონთა თასი. სხვათა შორის, დიდი ისტორიის მქონე გუნდი მიმდინარე სეზონს ძალიან ცუდად ატარებს და გავარდნის რეალური კანდიდატია...

პორტუგალია

“ბენფიკა” – პორტუგალიის ყველაზე ტიტულოვანი გუნდიც ჯერ არ დაქვეითებულა. “ბენფიკას” ჩემპიონატი 35-ჯერ მოუგია, 22-ჯერ თასი, 7-ჯერ ლიგის თასი, 5-ჯერ კი, ქვეყნის სუპერთასი. “ბენფიკა” ევროასპარეზზეც წარმატებულია: 2-ჯერ ჩემპიონთა თასი მოიგო, თუმცა ევროტურნირების ფინალში შვიდჯერ უთამაშია.

“პორტუ” – იგივე გვეთქმის “პორტუზეც” – თუმცა, “დრაკონები” “ბენფიკას” ტიტულებით ჩამოუვარდებიან: 27 ჩემპიონობა, 20 სუპერთასი, 2 ჩემპიონთა თასი და 2 უეფას თასი.

“სპორტინგი” – ამავე სიაშია მესამე პორტუგალიური მონსტრი “სპორტინგი” – ლისაბონურმა გუნდმა 1902 წლიდან დღემდე მოახერხა და არ გავარდა. 18-ჯერ გახდა ჩემპიონი, 16-ჯერ თასი მოიგო, 8-ჯერ სუპერთასი და ერთხელ თასების თასი.

ესპანეთი

“ატლეტიკი” – ბილბაოს “ატლეტიკი” ერთ-ერთია იმ გუნდთაგან, რომელსაც პრიმერადივიზიონი არასდროს დაუტოვებია. ბასკურ გუნდს ტიტულების არ კალია: 8 ესპანეთის ჩემპიონობა, 23 კოპა დელ რეი, და 2 ესპანეთის სუპერთასი.

“ბარსელონა” – სიაშია რაღა თქმა უნდა, “ბარსლეონაც”. კატალონური გრანდი ევროპაში ერთ-ერთი ყველაზე ტიტულოვანი კლუბია. 24 ქვეყნის ჩემპიონის ტიტული, 28 კოპა დელ რეი, 12 ესპანეთის სუპერთასი, 5 ჩემპიონთა ლიგა, 4 თასების თასი, 5 ევროპის სუპერთასი, 3 მსოფლიოს საკლუბო ჩემპიონობა.

“რეალი” – არც მადრიდის “რეალი” გავარდნილა ოდესმე პრიმერადან. “სამეფო კლუბმა” ესპანეთის ჩემპიონატი 32-ჯერ მოიგო, 19-ჯერ ქვეყნის თასი, 9-ჯერ სუპერთასი. რაც შეეხება ევროასპარეზსს: 11 ჩემპიონთა ლიგა, 1 საკლუბო მსოფლიოს ჩემპიონატი, 3 საკონტინტეთაშორისო თასი, 2 უეფას თასი და 3 ევროპის სუპერთასი.

იტალია

“ინტერი” – მილანის “ინტერნაციონალე” ერთადერთი იტალიური გუნდია, რომელიც სერია ა-დან არასდროს გავარდნილა. ლომბარდიული გრანდი 1908 წელს შეიქმნა და მას შემდგომ 18-ჯერ მოიგო სკუდეტო, 7-ჯერ კოპა იტალია, 5-ჯერ იტალიის სუპერთასი, 3-ჯერ უეფას თასი, ამდენჯერვე ჩემპიონთა ლიგა და 2-ჯერ საკონტინტეთაშორისო თასი. “ინტერმა” 2010 წელს ჰეთ-თრიქი შეასრულა.

რაც შეეხება საქართველოს – ჩვენი ქვეყნის უმაღლესი ლიგა დაარსების დღიდან დღემდე ერთადერთ გუნდს არ დაუტოვებია: თბილისის “დინამოს”. ჩვენი ქვეყნის ყველზე ტიტულოვანი გუნდის ანგარიშზე შემდეგი ტიტულებია: საქართველოს ჩემპიონი 16, საქართველოს თასი – 13, საქართველოს სუპერთასი – 7, თასების თასი – 1, სსრკ ჩემპიონი – 2, სსრკ თასი – 2, დსთ-ს თასი – 1.