სამხრეთ ამერიკის საფეხბურთო კონფედერაციამ გამოაცხადა, რომ ბრაზილიური კლუბი “შაპეკოენსე” ავიაკატასტროფის შემდეგ პირველ ოფიციალურ მატჩს 29 იანვარს, სანტა კატარინას შტატის ჩემპიონატში “ინტერნასიონალის” წინააღმდეგ ჩაატარებს.

როგორც ცნობილია, “შაპეკოენსეს” 30 ნოემბერს სამხრეთ ამერიკის თასის ფინალის პირველი შეხვედრა უნდა გაემართა კოლუმბიურ “ატლეტიკო ნასიონალთან”. თვითმფრინავმა, რომლითაც ბრაზილიური კლუბი ამ თამაშზე მიემგზავრებოდა, კოლუმბიაში, მედელინთან ახლოს კატასტროფა განიცადა. ავიაკატასტროფას 71 ადამიანის სიცოცხლე შეეწირა, მათ შორის “შაპეკოენსეს” თითქმის მთელი შემადგენლობა.

ტრაგედიის შემდეგ, “ატლეტიკო ნასიონალის” ინიციატივით, საფეხბურთო კონფედერაციამ ბრაზილიური კლუბი სამხრეთ ამერიკის თასის გათამაშების გამარჯვებულად გამოაცხადა. ბრაზილური საინფორმაციო საშუალებების ცნობით, ამჟამად აქტიურად მიმდინარეობს გუნდის აღდგენის პროცესი.