საქართველოს თავისუფალი სტილით მოჭიდავეთა ნაკრების წევრი ბექა ლომთაძე (61 კგ) მსოფლიოს ჩემპიონატის ფინალში გავიდა. არაოლიმპიური წონითი კატეგორიებისთვის სეზონის უმთავრეს შეჯიბრებას ბუდაპეშტი მასპინძლობს.

უნგრულ ხალიჩაზე ლომთაძემ ოთხ მეტოქეს აჯობა: ყირგიზ ადილეტ მამატაევს (5:0), მოლდოველ ანდრეი პერპელიტას (5:2), საფრანგეთის ნაკრების წევრ იური სიემაკინსა (12:2) და აზერბაიჯანელ ახმედნაბი გვარზატილოვს (12:11). ფინალში კი ამერიკელ ლოგან ჯეფრი შტიბერს დაუპირისპირდება.

დღესვე, მსოფლიოს ჩემპიონ-პრიზიორები ბერძნულ-რომაული სტილით ჭიდაობაშიც უნდა გამოვლინდნენ, 71 კილოგრამ წონით კატეგორიაში, სადაც საქართველოს სახელით კონკურენციაში მინდია წულუკიძე ჩაება, მაგრამ მედლისთვის ბრძოლას მერვედფინალიდან გამოეთიშა.

ფინალური ბლოკის შეხვედრები თბილისის დროით 21:00 საათზე დაიწყება და პირდაპირ ინტერნეტ-რეპორტაჟს მსოფლიო ჭიდაობის გაერთიანების ოფიციალური ვებ-გვერდი განახორციელებს.