ესპანეთის ლიგა ენდესას მორიგ ტურში გამორჩეული მატჩები ჩაატარეს “ანდორას” ქართველმა ლეგიონერებმა გიორგი შერმადინმა და ბექა ბურჯანაძემ – პირველმა მათაგანმა პარკეტზე 25:18 წუთში 11 ქულა და 13 მოხსნა მიითვალა. გიორგიმ 5-დან 2 ორქულიანი ჩააგდო და 9-დან 7 საჯარიმო სტყორცნა ზუსტად. ეს გარჯა ქართველ ცენტრს დაუფასდა და ლიგა ენდესას ოფიციალურმა ვებგვერდმა ტურის სიმბოლურშიც შეიყვანა.

რაც შეეხება ბურჯანაძეს – მან “ფუენლაბრადას” წინააღმდეგ 22:18 წუთი ითამაშა და ამ დროში 13 ქულა და 7 მოხსნა დააგროვა. ბურჯანაძემ 4-დან 3 ორქულიანი, 4-დან 2 სამქულიანი და 2-დან ერთი საჯარიმო ისროლა ზუსტად.

“ანდორას” 9 ტურში 6 მოგება აქვს 3 წაგების საპირისპიროდ და სატურნირო ცხრილში მე-6 ადგილზეა.