სუმოს უმაღლეს მაკუუჩი დივიზიონში, 2017 წლის სეზონის პირველ ბაშოზე ისევ ორი ქართველი სეკიტორი იჭიდავებს. ლევან გორგაძემ (ტოჩინოშინი) და თეიმურაზ ჯუღელმა (გაგამარუ) ნოემბრის სუპერტურნირი საბოლოო დადებითი ბალანსით – კაჩი-კოშით ჩაამთავრეს და პირადი რეიტინგის გაუმჯობესებაც გაინაღდეს.

განსაკუთრებით წარმატებული გასული ბაშო ტოჩინოშინისთვის გამოდგა, რომელიც დოჰიოზე მე-6 მაეგაშირას რანგში გადიოდა. ბოლო – მე-15 ტურში მან მე-15 მაეგაშირა იშიურას აჯობა და შეჯიბრება 5-ქულიანი დადებითი ბალანსით – 10 მოგებით და 5 წაგებით დაასრულა.

გაგამარუ სეზონის ბოლო ბაშოს კრიტიკული რეიტინგით შეხვდა. 199-კილოგრამიანი ქართველი გოლიათი მე-15 მაეგაშირას წოდებით ჭიდაობდა და თუ მინიმუმ 8 ქულას არ აიღებდა, მეორე დივიზიონში დაქვეითებას ვერ გადაურჩებოდა.

ჯუღელმა სასურველი ბალანსი და ელიტაში დარჩენა ბოლოსწინა ტურში გაინაღდა, გორგაძის ძლევით. გუშინ კი მე-9 მაეგაშირა მიოგირიუსთან დამარცხდა.

"იმპერატორის თასს” კი იოკოძუნა კაკურიუ დაეუფლა, რომელმაც ნოემბრის ბაშოზე 14 ქულა მოიპოვა.