ლონდონში წლის შემაჯამებელი ტურნირი ენდი მარეის გამარჯვებით დასრულა. ბრიტანელმა ჩოგბურთელმა აღნიშნული ტურნირი პირველად მოიგო და 2017 წლამდე ის მსოფლიოს რეიტინგის სათავეში იქნება.

მარეიმ ფინალში სერბი ნოვაკ ჯოკოვიჩი 6:3, 6:4 დაამარცხა. შეხვედრა საათსა და 44 წუთს გაგრძელდა. ერთ-ერთი ფაქტორი, რის გამოც ჯოკოვიჩმა წააგო, 30 უნებლიე შეცდომაა, ხოლო მარეის 15 შეცდომა ჰქონდა. ნოლემ ერთი შესაძლებლობიდან ბრეიკ-პოინტი ბრეიკად აქცია, ხოლო მარეიმ 9-დან სამი ბრეიკი შეასრულა. კორტზე ენდი უკეთ გადაადგილდებოდა, ნოლეს კი “როლან გაროსის” მოგების შემდეგ აშკარად ფსიქოლოგიური პრობლმეები აქვს, რის შესახებ ადრე თვითონაც ისაუბრა.

ენდიმ კარიერაში 44-ე ტიტული მოიპოვა. ამ გამარჯვებით მარეიმ 2 391 000 ამერიკული დოლარი გამოიმუშავა, ჯოკოვიჩმა – 1 261 000.

მარეი 12 410 ქულით რეიტინგის სათავეში იმყოფება, ნოლე 11 780 ქულით მეორე ადგილზეა.