საქართველოს ჩემპიონატის მეორე ლიგის აღმოსავლეთის გ ზონაში (ასეთი სულ 8 ზონაა) ცენტრალური მატჩი გაიმართა: "შევარდენი 1906" ლიდერ "ცხუმს" დაუპირისპირდა და 3:0 მოუგო. ეს მოგება, ფაქტობრივად, ჯგუფის ჩემპიონობის ტოლფასი იყო, რადგან "შევარდენი 1906"-ს საუკეთესო პოზიცია აქვს, სამი მატჩი დარჩა და სამივეს თუ მოიგებს, პირველზე გავა. და სამივე დარჩა სუსტ გუნდებთან, რომლებსაც პირველ წრეში დიდი ანგარიშებით სძლია...

მეორე ლიგის რვავე ზონაში გამარჯვებულები გაისად ეროვნული ლიგა 1-ში (ანუ რანგით მესამე ლიგა) ითამაშებენ და წლიურად 250 000 ლარი ექნებათ დაფინანსება.

მოცემული სიტუაციით, "ცხუმს" ფრეც ხელს აძლევდა, მაგრამ დამარცხდა "შევარდენი 1906"-თან. შეხვედრას ფიფას არბიტრი გიორგი ვადაჭკორია სჯიდა და მან ორი ფეხბურთელი გაუძევა "ცხუმს". ერთი პირველ ტაიმში, მეორეც მეორე ნახევარში.

აღნიშნულ ვიდეოში კარგად ჩანს პირველი გაძევების მომენტი. ამ დრო 0:0 იყო და სამივე გოლი მეორე ტაიმში გავიდა. მეორე გაძევებას რაც შეეხება, მსაჯის მიმართ სიტყვიერ შეურაცხყოფას ჰქონდა ადგილი.

მატჩის შემდეგ კი ვადაჭკორიას მიმართ აგრესიამ იმატა, მას ხელითაც შეეხნენ. მომხდარის გამო "ცხუმის" პრეზიდენტი ალექსანდრე წულაია იხდის ბოდიშს და ოფიციალურ განცხადებაში აღნიშნავს, რომ კლუბმა ინციდენტის მონაწილეებთან კონტრაქტი გაწყვიტა.

სოხუმის „ცხუმის" პრეზიდენტის, ალექსანდრე წულაიას განცხადება:

"მე, როგორც სოხუმის საფეხბურთო კლუბის „ცხუმის“ პრეზიდენტს, მსურს საზოგადოებას ვაცნობო ჩვენი კლუბის ოფიციალური პოზიცია იმ ინციდენტთან დაკავშირებით, რომელსაც ადგილი ჰქონდა 2016 წლის 16 ნოემბერს სკ „ცხუმი“- სკ „შევარდენი“ მატჩის შემდეგ. ვაცხადებ, რომ „ცხუმის“ ცალკეული ფეხბურთელის ქმედება კატეგორიულად მიუღებელია, ეს არის სპორტსმენის მხრიდან სპორტული პრინციპების დარღვევა, გუნდისა და თანაგუნდელების დიდი შრომის დაუფასებლობა. ფეხბურთელებმა, რომლებიც აღნიშნულ ინციდენტში მონაწილეობდნენ, შელახეს ზოგადად ფეხბურთის, ჩვენი გუნდისა და მსაჯების ღირსება. საფეხბურთო კლუბი „ცხუმის“ მიერ უკვე განხორციელდა ზომები: ინციდენტში მონაწილე ფეხბურთელებთან შეწყდა კონტრაქტი, კლუბის ერთ-ერთი მწვრთნელი განთავისუფლებულია პოსტიდან. 16 ნოემბრის მატჩის არბიტრი გიორგი ვადაჭკორია არის მაღალი კლასის მსაჯი და აღნიშნული შეხვედრაც კვალიფიციურად წარმართა. მე მსურს გუნდის სახელით მას მოვუხადო ბოდიში და ვუსურვო წარმატებები, ასევე ვუხდით ბოდიშს საზოგადოებას ამ ინციდენტის გამო. გუნდის სახელით საფეხბურთო კლუბ „შევარდენს“ ვულოცავ გამარჯვებას".

"შევარდენი 1906", როგორც იცით, ამ ზაფხულს აღსდგა. გადავხედოთ მეორე ლიგის სხვა ზონებს, თუ რა სიტუაციაა.

აღმოსავლეთი ა: "ნორჩი დინამო" გაჩემპიონდა, ამ გუნდში კი თამაშობენ ზაალ ელიავა, ზურაბ მენთეშაშვილი, სევასტი თოდუა, გიორგი მელქაძე, გოგი ფიფია, ზურაბ ძამსაშვილი...

აღმოსავლეთი ბ: ორი გუნდი იბრძვის და მათი დაპირისპირება 20 ნოემბერს გაიმართება. მარნეულის "ალგეთი" და თბილისის "ლოკომოტივი 2". თბილისელებს ფრეც დააკმაყოფილებთ, "ალგეთს" კი მხოლოდ გამარჯვება.

აღმოსავლეთი გ: ეს ყველაზე ძლიერი ჯგუფი იყო და უკვე დავწერეთ, "შევარდენი 1906" თითქმის ჩემპიონია. "ცხუმი", "საბურთალო 2" და "ვარკეთილიც" ძლიერები არიან, ამ სამ გუნდს ნებისმიერ სხვა ჯგუფში გაცილებით მეტი შანსი ექნებოდა ჩემპიონობისა.

აღმოსავლეთი დ: "თელავი" ჩემპიონია, გუნდმა ორი ტურით ადრე 7 ქულით გაუსწრო "რუსთავი 2"-ს.

ცენტრალური: "გორი", ფაქტობრივად, უკონკურენციოა, 9-ქულიანი ჰანდიკაპი აქვს მეორეადგილოსან ხაშურის "ივერიასთან" და ჩემპიონია.

დასავლეთი ა: "მარგვეთი" პირველზეა და ერთი ქულით უსწრებს "საირმეს". დარჩა მხოლოდ ერთი ტური და ორივე გუნდს საშინაო მატჩი აქვს. ზესტაფონელები "იმერეთი 2"-ს უმასპინძლებენ, "საირმე" კი - "რაჭას". მოკლედ, მარგველებზეა დამოკიდებული, ჩემპიონობის მეტი შანსი მათ აქვთ...

დასავლეთი ბ: ქედის "ბეთლემი" გაჩემპიონდა, ერთი ტური დარჩა და 5 ქულით უსწრებს ოზურგეთის "მერცხალს".

დასავლეთი გ: ჩხოროწყუს "სამეგრელო" პირველია, 3 ქულით გაუსწრო ჩოხატაურის "ბახმაროს".