ქართველების მორიგი შედეგიანი თამაში და „ანდორას“ მორიგი გამარჯვება. ესპანეთის ჩემპიონატის მორიგ ტურში ბექა ბურჯანაძისა და გიორგი შერმადინის გუნდი აუტსაიდერ „ბრუესას“ ესტუმრა და დაძაბულ ბრძოლაში - 93:91 დაამარცხა, რაშიც ლომის წილი ქართველმა ლეგიონერებმა დაიდეს.

შერმადინი სასტარტო ხუთეულში გამოჩნდა და 22:12 წუთში სტუმართა მხრიდან ყველაზე მეტი – 15 ქულა, 6 მოხსნა (2 შეტევაში) და 1 ჩაჭრა მოაგროვა. ქართველმა ცენტრმა 9-დან 5 ორქულიანი და 5-ვე საჯარიმო ჩააგდო, ბურთი ერთხელ დაკარგა, 3 პერსონალური ფოლი მიიღო და მის წინააღმდეგაც ამდენჯერვე დაჯარიმდნენ.
მოედანზე 24:04 წუთი გაატარა ბურჯანაძემ, რომლის მონაგარიც 11 ქულა, 5 მოხსნა (4 შეტევაში) და 2 ჩაჭრა გახლდათ. ბექამ 5-დან 2 ორქულიანი, 4-დან 2 სამქულიანი და 1 საჯარიმო გამოიყენა, 2 შეცდომა დაუშვა, ერთხელ დაჯარიმდა, მასზე კი თამაშის წესები 3-ჯერ დაირღვა.

5 მოგებითა და 2 მარცხით „ანდორა“ ცხრილში მე-5 ადგილზეა. შემდეგ ტურში, 19 ნოემბერს, ქართველების გუნდი „ობრადორიოს“ უმასპინძლებს.

gbf.ge