ლონდონის “ჩელსიში” იტალიელ ანტონიო კონტეს საქმეები მთლად დალაგებულად რომ არ აქვს, აქამდეც ცნობილი იყო. ახლა კი, აპენინელს ნელ-ნელა ფეხბურთელებიც უმხედრდებიან. როგორც ბელგიელმა ედენ აზარმა თქვა, კონტე მას პოზიციის გარეშე ათამაშებს და ამიტომაც უჭირს მიმდინარე სეზონში რაიმე ღირებულის შექმნა.

“ვთამაშობ პოზიციის გარეშე – მე ძალიან მიყვარს 10 ნომერზე თამაში, გამთამაშებლად, ფორვარდებს უკან, მაგრამ “ჩელსი” ამ პოზიციას საერთოდ არ იყენებს. ამიტომაც მიწევს მარცხნივ ასპარეზობა. მისტერს უნდა ვთხოვო, რომ იმ ადგილზე დამაყენოს, სადაც ბელგიის ნაკრებში ვთამაშობ”, - ამბობს აზარი.

არახალი ამბავია, რომ ანტონიო კონტე 3-5-2 ტაქტიკის მოტრფიალეა და ხსენებული სისტემის დანერგვას “ჩელსიში” ჯიუტად ცდილობს, მაგრამ ამ საქმიდან იტალიელს ამ დროისთვის ბევრი არაფერი გამოსდის. აგერ აზარმაც გამოთქვა უკმაყოფილება და ვინ იცის, შემდეგი ვინ იქნება...