ბექა ბურჯანაძისა და გიორგი შერმადინის „ანდორამ“ ესპანეთის უმაღლეს ლიგაში მორიგი გამარჯვება მოიპოვა. მეორე ტურის მატჩში ანდორელებმა „ხუვენტუდს“ უმასპინძლეს და 19 ქულის სხვაობით - 92:73 სძლიეს.

გიორგი შერმადინმა 19 წუთი ითამაშა და 10 ქულასთან ერთად 6 მოხსნა, 3 ჩაჭრა და 1 პასი დააგროვა. ქართველმა ცენტრმა 4-დან 2 ორქულიანი და 7-დან 6 საჯარიმო ჩააგდო. შერმადინმა 4 ჯარიმა მიიღო, მეტოქეები კი მასზე 6-ჯერ დაჯარიმდნენ.

ბურჯანაძემ მოედანზე ძალიან აქტიური 11 წუთი გაატარა, რა ხნის განმავლობაშიც 3-დან 2 ორქულიანი, 5-დან 1 სამიანი და 1-დან 1 საჯარიმო ჩააგდო. ბექამ საბოლოოდ 8 ქულა და 2 მოხსნა დააგროვა. ანდორელებს 20 ქულით დევიდ იელინეკი გამოირჩა, 18 ქულა კი ნაჩო მატინმა მიითვალა.

2-დან 2 გამარჯვებით „ანდორა“ ლიდერთა შორისაა. მომდევნო მატჩს „ანდორა“ 16 ოქტომბერს, ვიტორიაში, თორნიკე შენგელიას „ბასკონიასთან“ გამართავს.

gbf.ge