ქართველმა სუმოისტმა ლევან გორგაძემ იგივე ტოჩინოშინმა აკი ბაშოზე მე-8 მარცხი განიცადა, რაც იმას ნიშნავს, რომ უარყოფითი ბალანსის (მაკე-კოში) დაფიქსირებასა და შესაბამისად, წოდებაში ვარდნას ვერ გადაურჩება.

შეგახსენებთ, რომ ტოჩინოშინი ტოკიოს “რიოგოკუ კოკუგიკანში” მიმდინარე სუპერტურნირს აღმოსავლეთის მე-2 მაეგაშირას წოდებით შეხვდა, თუმცა, სათანადო დონეზე ვერ ირჯება. ქართველმა სუმოისტმა 2 მოგების წილ მე-8 მარცხი (იორიკირით) დასავლეთის მე-3 მაეგაშირა ტაკანოივასთან განიცადა.

ტოჩინოშინს აკი ბაშოზე 5 ორთაბრძოლა დარჩა ჩასატარებელი, თუმცა, ყველაც რომ მოიგოს, სასურველ შედეგს მაინც ვეღარ დააფიქსირებს. გორგაძის მომდევნო მეტოქე ბრაზილიელი კომუსუბი კაისეია, რომელსაც ურთიერთშეხვედრებში 8:6-ს უგებს.

თანამემამულისგან განსხვავებით, უკეთ აქვს საქმეები გაგამარუს შიკონათი ცნობილ თეიმურაზ ჯუღელს, რომელიც სექტემბრის ტურნირზე აღმოსავლეთის მე-12 მაეგაშირას წოდებით ირჯება.

ქართველმა გოლიათმა დასავლეთის მე-15 მაეგაშირა კიოკუშუჰოს ოშიდაშით აჯობა და თანაბარ ბალანსზე (5 მოგება, 5 მარცხი) გავიდა. ხვალ გაგამარუ ძალებს დასავლეთის მე-9 მაეგაშირა ტაკეკაძესთან მოსინჯავს, რომელთანაც უკეთესი მაჩვენებლები აქვს: 12 მოგება, 5 მარცხი.

აკი ბაშოს ერთპიროვნულ ლიდერად ოძეკი გოეიდო რჩება, რომელმაც მიჯრით მე-10 გამრჯვება იზეიმა, იოკოძუნა ჰარუმაფუჯის და აღმოსავლეთის მე-14 მაეგაშირა ენდოს აქტივში კი 9-9 მოგებაა.