19 სექტემბერს სპორტისა და ახალგაზრდობის საქმეთა მინისტრი ტარიელ ხეჩიკაშვილი ფეხბურთის ფედერაციის პირველ ვიცე-პრეზიდენტთან კახა ჭუმბურიძესთან ერთად ცაგერში ჩავიდა, სპორტული ინფრასტრუქტურის მდგომარეობას გაეცნო და ადგილობრივ ხელისუფლებასთან ერთად რეგიონში სპორტის განვითარების სამომავლო გეგმები დასახა.
მინისტრმა ცაგერის სპორტის სასახლეში შეკრებილ ადგილობრივ სპორტსმენებს სხვადასხვა სპორტული ინვენტარი უსახსოვრა - ფრენბურთის და კალათბურთის ბურთები, მოკრივეთა აღჭურვილობა, ძიუდოს და ქართული ჭიდაობის საჭიდაო ფორმები და კალათბურთის სათამაშო კომპლექტი გადასცა. ხეჩიკაშვილმა მწვრთნელების და სპორტსმენების მხრიდან ცაგერში არსებული პრობლემები მოისმინა და ადგილობრივ ხელისუფლებასთან ერთად მათი გადაჭრის გზებზე იმსჯელა. მოგვიანებით, დაათვალიერა ცაგერში მშენებარე ახალი სპორტის სასახლე, რომელსაც რეგიონული განვითარების ფონდი აშენებს. სასახლე მრავალფუნქციური იქნება და შიდა პირველობების გარდა საერთაშორისო მასშტაბის შეჯიბრებებსაც უმასპინძლებს.
მინისტრმა კახა ჭუმბურიძესთან ერთად ცაგერის სტადიონზე შეკრებილ ახალგაზრდა ფეხბურთელებს ბურთები და სათამაშო ფორმები გადასცა. ფეხბურთის ფედერაციას დაწყებული აქვს სტადიონის რეაბილიტაციის წინამოსამზადებელი სამუშაოები.
ცაგერის მოედნის ზომა სრულად შეესაბამება უეფას მიერ მოთხოვნილ სტანდარტებს, რაც საშუალებას იძლევა სტადიონის რეკონსტრუქციის შემდეგ აქ საქართველოს ასაკობრივი და უმაღლესი ლიგის მატჩების გარდა, საერთაშორისო ეგიდით გასამართი მატჩებიც ჩატარდეს.
სპორტის სამინისტროს პრესსამსახური
