ინგლისის ეროვნული ნაკრებისა და “მანჩესტერ სიტის” ყოფილი ფეხბურთელი ჯოლეონ ლესკოტი ამიერიდან ათენის აეკში ითამაშებს, რომელსაც მოგეხსენებათ, ქართველი თემურ ქეცბაია უდგას სათავეში. აღნიშნულ ინფორმაციას ბერძნული გუნდის ვებგვერდი ავრცელებს. 34 წლის ლესკოტი აეკს ბირმინგემის “ასტონ ვილადან” თავისუფალი აგენტის სტატუსით შეუერთდა.

ლესკოტს კარგი კარიერა ჰქონდა – მან “სიტის” რიგებში 2012 და 2014 წლებში ორჯერ მოიგო ინგლისის პრემიერლიგა, ხოლო 2011 წელს ასოციაციის თასს დაეუფლა, 2014-ში ლიგის თასს. მთლიანობაში ჯოლეონმა პრემიერლიგის 286 შეხვედრაში 23 გოლის გატანა შეძლო და გარდა “სიტისა”, “ასტონ ვილას”, “ვესტ ბრომვიჩისა” და “ევერტონის” რიგებშიც უთამაშია.