არნემის “ვიტესის” ქართველი ლეგიონერი ვაკო ყაზაიშვილი უკმაყოფილოა იმ ფაქტით, რომ გუნდის მთავარი მწვრთნელი მას ნაკლებად ენდობა. როგორც ქართველის სიტყვებს ჰოლანდიური ინტერნეტპორტალი gelderlander.nl-ი ციტირებს, იგი არ ეთანხმება მწვრთნელს, თუმცა იქვე ხაზს უსვამს, რომ “როდასთან” მატჩში ძირითადში ვერმოხვედრა არ გაკვირვებია.

“ეს არ იყო ჩემთვის მოულოდნელი, რადგან ბოლო დროს მთავარი მწვრთნელი ჩემით კმაყოფილი არ ყოფილა. თუმცა, მე არ ვეთანხმები მას – ყოველთვის მინდა, რომ ვითამაშო და არ ვფიქრობ, რომ ერთი კვირის წინ, “დენ ჰააგთან” ცუდად ვითამაშე. მიუხედავად ამისა, რა თქმა უნდა, კმაყოფილი ვარ, რომ სამი ქულა მოვიპოვეთ”, - თქვა ყაზაიშვილმა.

თავის მხრივ, ქართველი შემტევის შესახებ “ვიტესის” თავკაცმა ჰენკ ფრეიზერმაც ისაუბრა. როგორც იგი ამბობს, ვაკო კვლავ რჩება ერედივიზიონის ერთ-ერთ საუკეთესო მოთამაშედ:

“ფეხბურთელებმა ბევრი უნდა იშრომონ, რომ შემდეგ თამაშები მოვიგოთ. მხოლოდ ასე შეგვიძლია გავიმარჯვოთ ურთულეს ბრძოლებშიც. ყაზაიშვილი? – ის რჩება ერედივიზიონის ერთ-ერთ საუკეთესო ფეხბურთელად, რადგან მას განსაკუთრებული თვისებები აქვს და შეუძლია მეტოქის ნახევარზე ყველაფერი გააკეთოს. მე კვლავინდებურად ვენდობი მას”, - თქვა ფრეიზერმა.

შეგახსენებთ, ერედივიზიონის ბოლო ტურში “ვიტესმა” სტუმრად კერკადეს “როდას” 1:0 აჯობა, ხოლო ვაკო ყაზაიშვილმა მოედანზე მხოლოდ ბოლო 10 წუთი გაატარა.